Казанлыларның ишегаллары “чүп полигоны”на әверелгән

– Быел чүп чыгару эшләре канәгатьләнерлек булды. Әлбәттә, кайбер урыннарда чүп туплау мәйданчыкларына керү юллары алдан чистартылмаган булу сәбәпле, чүпне чыгаруда тоткарлыклар да күзәтелде. Сөйләшә белгән идарәче компанияләрдә чүпне чыгару үз вакытында оештырылды, ә гаеплеләрне эзләп һәм проблемалардан качып йөрүчеләрнекендә  чүп туплау мәйданчыгына керү юлларын кар баскан. Административ-техник инспекция хезмәткәрләрен коммерция объектларын, ишегаллары территорияләрен карап-тикшереп чыгуларын сорыйм. Үгетләп утыру вакыты узды, чара күрү вакыты җитте. Районнар хакимиятләре башлыкларының йортлар түбәләренә игътибар бирүләре зарур. Кар тиешле чиктән күбрәк тупланган йортлар түбәләреннән карны төшерергә кирәк. Ләкин, түбәдән төшерелгән кар атналар буена җирдә ятмасын, әлеге кар үз вакытында чыгарылсын, – дип кисәтте Казан шәһәр Башкарма комитеты җитәкчесе Рөстәм Гафаров “эшлекле дүшәмбе” киңәшмәсендә.

Казанның торак-коммуналь хуҗалык комитеты рәисе Илдар Хисмәтуллин таныштырганча, “ПЖКХ” идарәче компаниясе” тарафыннан бәйрәм көннәрендә көндезләрен – 98, ә төннәрен 23 махсус техника полигонга чүп чыгарган. Совет һәм Мәскәү районнары идарәче компанияләре, “Уңайлы торак” идарәче компаниясе йортлар тирәләрен җыештыруга җаваплырак караган. “Парус” торак милекчеләре ширкатендә, “Оазис” һәм “Дружный двор” идарәче компанияләре территорияләрендә кимчелекләр теркәлгән. Йортларның чүп туплау мәйданчыклары янына автомобильләр куеп калдыру сәбәпле, 542 очракта йөк машиналары чүпне кереп ала алмаган.

“Открытая Казань” сервисына 31 декабрьдән 11 гыйнварга кадәр, ишегалларыннан чүп чыгаруга канәгатьсезлек белдерелгән, 121 шикаять кергән. Ишегалларының кардан чистартылмавын әйтеп, 2876 мәртәбә шалтыратканнар. Яңа ел бәйрәме көннәрендә ишегалларын җыештыруда 1150 кеше эшләгән, 154 махсус техника файдаланылган. Авыш түбәле 1084 йортның түбәсеннән кар төшерелгән.

– Кайбер күп катлы йортларга салкын су бирүдә – 27, җылылык белән тәэмин итүдә – 8, кайнар су белән тәэмин итүдә – 2 һәм электр белән тәэмин итүдә 14 өзеклек килеп туды. Барлык авария очраклары тиз арада төзекләндерелде. Идарәче компанияләргә ярдәм йөзендә, ишегалларын кардан чистартырга чыккан казанлыларга рәхмәт! Кискен һава шартларында шулай бергәләшеп эшләмәгәндә ишегалларын тәртипкә китерү авыр, – диде Илдар Хисмәтуллин.