Кредитны вакытыннан алда түләүнең плюслары һәм минуслары

Янәсе, бу очракта банклар табышны югалта һәм күп акча эшли алмаган перспективасыз клиентны кара исемлегенә кертә. Беренче түләүне керткәнче, бу мәсъәләгә ачыклык кертергә булдым. Бу чыннан да шулаймы? Юк, дип саный икән финанс белгечләре. 

Кредитны вакытыннан алда түләүнең плюслары һәм минуслары

Банк заемщикка процентлар белән акча биргәндә, ул билгеләнгән график буенча даими рәвештә табыш алырга исәп тота. 

Шул ук вакытта ул бурычлы кешегә теләсә кайсы вакытта бөтен сумманы кире кайтаруны тыя да алмый. Канун буенча һәр заемщикның кредитны вакытыннан алда түләү хокукы бар.

Әгәр сез банктан кредит алган булсагыз, РФ ГК 810 маддәсе һәм 21.12.2013 елгы 353 номерлы ФЗ 11 маддәсе нигезендә, аны теләсә кайсы вакытта кире кайтарырга хокуклы. Ике атна (кулланучылар кредиты өчен) һәм бер ай дәвамында (максатчан кредит өчен) – банкны алдан кисәтүсез, соңрак булса – кредиторга алдан хәбәр итеп.

Вакытыннан алда түләп бетерүнең ике варианты бар:

-Тулысынча. Сез калган сумманы шунда ук кертәсез һәм килешүне вакытыннан алда үтисез.

-Өлешчә. Стандарт түләүдән күбрәк сумма кертәсез, һәм банк йә кредит вакытын киметә, йә айлык түләү күләмен яңадан саный.

Алдан түләүнең төп файдасы – процентлардагы экономия. Кредитның вакыты азрак булган саен, банкка хезмәт күрсәтү өчен азрак түлисез.

Мәсәлән, әгәр сез өч елга 18 процент белән 300 мең сум алсагыз һәм аны бер елдан кире кайтарсагыз, 40 мең сумга якын акчаны янга калдырасыз – 90 мең түгел, ә 47 меңнән аз гына күбрәк түлисез.

Моннан тыш, вакытыннан алда түләү бурыч йөкләнешен киметә. Әгәр сез ипотека яки зур сумманы башка максатларга алырга ниятлисез икән, бу аеруча мөһим. Сезнең ачык йөкләмәләрегез никадәр азрак булса, янәдән кредит алу өмете шулкадәр зуррак.

Әгәр зур суммалы һәм озак сроклы кредитның ставкасы (мәсәлән, ипотека буенча) төп ставкадан берничә пунктка түбәнрәк булса, акчаны түләүгә керткәнче, процентлы кертемгә салу отышлырак.

Асылы шунда ки, сез кертем (вклад) кереме (мәсәлән, еллык 15 процент) һәм кредит буенча ставка (мәсәлән, еллык 10 процент) арасындагы аермада акча эшлисез.

Сезнең 10 процентлы ипотеканы вакытыннан алда капларлык бер миллион сум акчагыз бар, ди. Моның урынына сез аны бер елга 15 процентлы кертемгә саласыз,  шул вакыт эчендә  150 000 сум (1 000 000 × 15 процент) акча эшлиячәксез.

Кредит буенча процентлар (әгәр  алдан капламасагыз) 1 000 000 × 10 процент = 100 000 ₽. Чиста табыш 50 000 сумны (150 000 – 100 000) тәшкил итә.

Күпләр югарыда әйтелгән мифтан курка. Әмма чынлыкта алдан түләп бетерүегез белән сез үз финансларыгыз белән идарә итә алуыгызны күрсәтәсез. Әгәр барысын да дөрес һәм барлык шартларны үтәп рәсмиләштерсәң, бу кредит тарихына уңай йогынты ясаячак. Әгәр дә сез даими рәвештә шулай эшләмисез икән, монда бернинди начарлык та юк.

Әлеге уйдырма, мөгаен, банкларның эш принципларын аңлап бетермәү аркасында барлыкка килгәндер. Чыннан да, кредиторларга бу отышлы түгел, әмма алар сезнең тарихны үзләре теләгәнчә үзгәртә алмыйлар. Мондый адымнан соң кредит тарихында бернинди тискәре билгеләр барлыкка килмәячәк.

Тик, әгәр дә беренче һәм бердәнбер кредитны алсагыз һәм аны бик тиз түләсәгез, кредит тарихы «буш» булып калырга мөмкин. Кыска вакыт булу сәбәпле, бу банкка ышанычлылыкны бәяләү өчен җитәрлек срок булмый. Шуңа күрә стратегик уйларга киңәш итәбез.

Лилия Яфизова