Кыргызстан Республикасында 30 ноябрьдә Югары Киңәшкә депутатлар сайлау була

Кыргызстан Республикасының Казандагы генераль консулы Эрик Бейшембиев “Татар-информ” мәгълүмат агентлыгында үткәрелгән матбугат конференциясендә таныштырганча, Кыргызтан парламентына депутатлар сайлауда Россиядә вакытлыча яшәүче, эшләүче яки белем алучы кыргызлар да катнаша ала.

– Татарстанда кыргызлар 30 ноябрьдә 8.00-20.00 сәгатьләрдә Казанда – “Сувар плаза”да, ә Чаллыда “Родник” Дуслык йортында тавыш бирә ала. Тавыш бирүдә катнашу өчен кыргызларның Кыргызстанда теркәлгәнлеге, ягъни, Кыргызстан гражданы булуы шарт. Ватандашлар үзләренең конституцион хокукларыннан файдалансын, – диде Эрик Бейшембетов.

Казан шәһәре Башкарма комитеты җитәкчесе урынбасары Азат Абзалов сөйләгәнчә, кыргызлар предприятиеләрдә, транспорт тармагында эшлиләр, мәдәни чараларда да активлыклык күрсәтәләр.

“Татарстан Республикасының Халыклар дуслыгы йорты” директоры Тимур Кадыров сүзләренә караганда, Татарстанда 2 меңнән артык кыргыз яши. Башка милләтләр кебек үк кыргыз балалары да үзләренең ана телләрен өйрәнә. Бу уңайдан Кыргызстан Республикасының Казандагы генераль консулы Эрик Бейшембиев:”Татарстан Рәисе Рөстәм Миңнехановка, республика Хөкүмәтенә башка милләтләр вәкилләренә игътибар күрсәткәннәре өчен зур рәхмәт! Кыргыз балаларына кыргыз телен өйрәнү мөмкилеге тудырылган, милли уен коралларында уйнарга өйрәнү түгәрәкләре эшли. Татарстан күп милләтле, дуслыкта яшәүче үрнәк республика”, – диде.