Ләйлә Фазлыева: «Сайлауларда катнашу һәрчак бәйрәм булган»

Бүген, Бердәм сайлау көнендә, Татарстанда халыкны берләштерүче чаралар күпләп уза. Сайлауларда катнашу - Татарстанның киләчәген хәл итү белән бергә гаилә белән очрашып, үзара мөнәсәбәтләрне ныгыту, җылы аралашулар көне, дип белдерде Татарстан премьер-министры урынбасары Ләйлә Фазлыева. 

- Бар кешене дә сайлау участокларына чакырабыз. Татарстанның киләчәгенә өлеш кертергә, бер-беребезгә башкарган эшләребез, үсештә булган республикабыз өчен рәхмәт белдерергә дәшәбез, — диде ул. 

Ул балачакта әнисе, әтисе һәм дәү әнисе белән сайлауларга бару турында җылы хатирәләр калуын әйтте. Сайлауларда катнашу һәрчак бәйрәм булуын әйтә ул. 

Сайлау участокларында ярминкәләр эшли, фотога төшеп айфон, машина оту мөмкинлеге бар, ә кичен барлык сайлаучылар бәйрәм концертына барып, гаилә белән бергәләп күңел ача алачак, диде Ләйлә Фазлыева. 

Исегезгә төшерәбез, бүген, 14 сентябрьдә Татарстан Рәисен сайлау уза. ТР Үзәк сайлау комиссиясе бу постка дүрт кандидатны теркәде: ЛДПРдан Руслан Йосыпов, КПРФтан Хафиз Миргалимов, “Социаль гаделлек өчен Россия пенсионерлар партиясе”ннән Виталий Смирнов һәм “Бердәм Россия”дән Рөстәм Миңнеханов. Шулай ук республика халкы Мәләкәс округы буенча Дәүләт Советы депутаты һәм 7,5 меңнән артык муниципаль берәмлек депутатлары өчен тавыш бирә.