«Ленин бабай әйткәнчә, укыгыз, укыгыз һәм укыгыз!»

Советлар Союзы Герое Б. К. Кузнецов исемендәге Казан кадет мәктәп-интернаты кадетларына Россия Федерациясе гражданы паспортлары тапшырылды. Россия һәм Татарстан гимннары белән ачылды әлеге чара. Бөек Ватан сугышында һәм хәрби бурычларын үтәгәндә һәлак булган кешеләр 1 минут тынылык белән хәтергә алынды.
– Россия Федерациясе гражданы паспорты алу – ул бик дулкынландыргыч мизгел. Илебезнең лаеклы гражданнары булыгыз, тормышыгызда һәм алдагы хезмәтегездә уңышлар телим! – дип котлады Татарстан премьер-министры урынбасары Ләйлә Фазлыева.

Россия Герое, Татарстанның Дәүләт Советы депутаты, махсус хәрби операциядә катнашкан Рәсим Баксиков яшь буынны ватанпәрвәрләр итеп тәрбияләүнең гаять әһәмиятле булуын искәртте. Кадетларга Россия Федерациясе Конституциясен бүләк итте.
– Сезнең кулда Россия Федерациясе паспорты һәм Конституциясе. Конституцияне белегез, анда язылганнарны үтәгез, дөреслекне яклагыз, Ватанның ышанычлы сакчылары булыгыз. Армиядә белемле кешеләр кирәк, фәннәрне яхшылап үзләштерегез. Ленин бабай әйткәнчә, укыгыз, укыгыз һәм укыгыз! – дип “әмер-өндәмә” бирде Рәсим Баксиков.

Ватанны саклаучылар елы, Бөек Җиңүгә 80 ел тулу уңаенан да оештырылган чарада Россия Федерациясе паспорты алган үсмер егетләр Ватанның тугъры гражданы булырга ант итте.

#ватаннысаклаучыларелы #бөекҗиңүгә80ел