Марат Әхмәтов гражданнар кабул итте

Бүген Дәүләт Советы Рәисе вазыйфаларын башкаручы, Татарстан Республикасы Рәисе каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе рәисе Марат Әхмәтов Казанда Россия Федерациясе Президентының кабул итү бүлмәсендә гражданнарны кабул итте. Татарстанлылар торак мәсьәләләре, шулай ук татар музыка сәнгатен үстерү буенча тәкъдимнәр белән мөрәҗәгать иттеләр. 

Татарстанның халык артисты Миңгол Галиев Марат Әхмәтовка Казан федераль университетының Филология һәм мәдәниятара багланышлар институты базасында үз вакытында бөек татар шагыйре Габдулла Тукай әйтеп калдырган татар җырларын башкаруның махсус методикасын һәм техникасын өйрәтүне оештыру тәкъдиме белән мөрәҗәгать итте. Шундый уникаль вокал техникага ия булган Миңгол Галиев үзе педагог ролендә чыгыш ясарга әзер.  

"Мин күп еллар дәвамында татарларның халык җырлавына нигезләнгән вокаль сәләтен үстерү методикасын кулланам. Безгә чын халыкча, Тукай күзаллаганча җырлау мәктәбен, милли вокал техникабызны үстерергә кирәк", – дип басым ясады Миңгол Галиев. 

Марат Әхмәтовка шулай ук Казанда яшәүче Айнур Моратов та мөрәҗәгать итте. Татар музыка иҗатын үстерү өчен ул халык җырлары көйләре партитурасы белән җыентык һәм милли музыка кораллары башкаруында татар халык сәнгатенең музыкаль альбомын чыгарырга тәкъдим итте. "Бу альбомны интернет-мәйданчыкларда, шулай ук телевидение һәм радиода урнаштырырга, флеш-тупланмаларда  чыгарырга һәм республика китапханәләренә тапшырырга мөмкин булыр иде", – дип билгеләп үтте музыкант.  

Марат Әхмәтов уникаль татар көйләрен генә түгел, халык җырлары текстларын да саклап калу тәкъдиме белән чыкты. Шул рәвешле татар музыка иҗатын да, башкару сәнгатен дә, туган телне дә үстерергә мөмкин.

Билгеле булганча, «Яшәү өчен инфраструктура» илкүләм проекты гамәлгә ашырыла.

ТР Дәүләт Советы матбугат хезмәте