Марат Әхмәтов журналистларга: «Сез кешеләр өчен – консультант да, юрист та, яклаучы да»

– Сүземне рәхмәт сүзләре белән башлыйм. Ил язмышы, республика тормышы белән бергә сез. Татарстанда яшәүче халкыбызның тормышын кайгыртып, хакимиятнең күзе, кулы җитмәгән урыннардагы проблемаларны да ишеттерәсез. Актуаль проблемаларны хакимияткә җиткерәсез һәм бергәләп чишелешләр табарга омтыласыз. "Сез кешеләр өчен – консультант да, юрист та, яклаучы да. Кирәкле, бик әһәмиятле хезмәтегез өчен сезгә ихлас рәхмәтемне белдерәм. Хезмәт хакларыгыз югары булмаса да, язмышыгызга хыянәт итмичә, тырышып эшлисез, – диде ул.

Бүген ясалма интеллектның киң куллануылуын билгеләп, “бер нәрсә үзгәрешсез кала: ул – мәгълүмат таба, аны тикшерә белү, укучы белән гадел сөйләшү алып бару. Объектив тәнкыйть булган, чын хис-кичерешләр чагылган сыйфатлы авторлык журналистикасына һәрвакыт ихтыяҗ булачак" диде Марат Әхмәтов.

Билгеле булганча, Татарстан милли матбугат лидеры. Спикер сүзләренчә, бу – буш сүз түгел. “Тормыш гел үзгәреп тора. Бездә вакыйгалар булмаган бер генә көн дә юк, һәм кешеләр шул вакытта, шул урында ук мәгълүмат алырга тели. Сезнең төп өстенлек – кешеләргә бик якын булуыгыз, аларның ихтыяҗларына профессиональ җавап бирә алуыгыз", – диде ул.

Татарстан Рәисе каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре буенча комиссия рәисе буларак, республика матбугаты белән алып барылган уртак проектлар өчен аерым рәхмәтен җиткерде, алга таба да бу эшне зур күләмдә алып барырга кушты. Моннан тыш, журналистларның ветераннар һәм тыл хезмәтчәннәренең батырлыгы, шулай ук махсус хәрби операция уздыру зонасындагы геройлар турында даими сөйләп-язып торуларын да билгеләп үтте.

Марат Әхмәтов сүзләренә караганда, бүгенге көндә авыл тормышын яктырту мөһим.

– Кызганычка, авыл тормышының абруе шактый югалды, гәрчә авыл тулы бер фәлсәфә. Анда безнең тамырлар, гореф-гадәтләр, туган телебез. Сез авылның җәлеп итүчәнлегенә йогынты ясый алыр идегез, – дип билгеләп үтте Дәүләт Советы Рәисе вазифаларын башкаручы.

«Татмедиа» республика матбугат һәм массакүләм коммуникацияләр агентлыгы җитәкчесе Айдар Сәлимгәрәев, хезмәттәшләрен сәламләп, медиатармакның, ясалма интеллект кертү белән бәйле рәвештә, күп үзгәрешләр кичерүен ассызыклады. “Әмма шул ук вакытта һөнәребездә сүз иң мөһиме булып кала. Ясалма интеллект, алгоритмнар – нибары ручка, карандаш кебек инструментлар. Укучыга сүзебезне җиткерү зарур”, – диде ул.

Дәүләт Советы депутаты, Татарстан Журналистлар берлеге рәисе Илшат Әминов та журналистика ул – гуманлылык, кешеләрне ярату, аларга булышу, дип билгеләп үтте.