Машина откан Алсу Зәкиуллина: “Әтинең юраганы юш килде”

Бердәм сайлау көнендә фотобәйгедә катнашып Sollers ST8 автомобиленә ия булган Алсу Зәкиуллина безгә шулай дип сөйләде. Алсу гаиләсе белән Әлмәт районының Кичүчат авылында яши. Күп бала әнисе ул. Һөнәре буенча рус теле һәм әдәбияты укытучысы. Көн дә егерме чакрым Әлмәт шәһәренә Ризаэтдин Фәхретдин исемендәге гимназиягә укытырга йөри.

Машина иясе булуын телевизордан үзе ишетеп белгән. “Кечкенә улымны йоклаткан арада күрше бүлмәдә сөенешкән тавышларны ишетеп чыксам, телевизор экранында безнең фотосурәтне күреп, шаккаттым”, – ди ул. 

Сайлаулар алдыннан гимназия директоры фотоконкурс булачагын хәбәр итеп, алар гимназиясендә тавыш биргән бер сайлаучының машина отканы турында әйтә. “Шуны ишетеп, мин дә кызыгып куйдым. Кич белән иремә дә сөйләдем. Сайлау көнне иремә эшкә иде. Без иртәдән балаларны уятып, киендереп, сайлауга чыгып йөгердек. Фотога төштек тә социаль челтәргә элдем. Көндез вакыт булганда телевизордан туры эфирны карап бардым. Әле иремә дә, кешеләр айфоннар ота, безгә булмады инде дип яздым. Ирем, без бар нәрсәгә дә үз көчебез, тырышлыгыбыз белән ирешәбез, андый нәрсәләр безгә җиңел генә бирелми, дип юатты да әле. Шуның белән нәрсәдер оту турында уйламадым да. Насыйп ризык тешеңне сындырып булса да керә, диләр. Өмет итмәгәндә машиналы булдык та куйдык. Синең җиңүеңне ишеткәч, үзебез откан кебек булды дип минем өчен ихластан шатланган кешеләр күп булды. Мине белмәүчеләр дә котлап яздылар. Дөньяда яхшы кешеләр күп икән дидем. Шуның өчен дә сөендем”, – дип шатлыгы белән уртаклашты Алсу.  

Алсуның машина отачагын әтисе сизенгән диярсең. “Сайлаулар алдыннан шимбә кич белән әти белән әни янына кич утырырга төштек. Шул фотобәйге турында сөйләштек. Якшәмбе әти дә эштә иде. Көндез әнигә шалтыраткач, Илназ белән Алсу машиналарын кайчан алып кайта икән, дип шаяртып әйткән булган.

“Сайлаудан соң әби янына кердек, аңа да конкурста катнашабыз дип фотоны күрсәттек. Балалар бәхетенә бәлки отып та куярсыз, диде ул. Барыбызның да уе шул машина тирәсендә булган”, дип көлә Алсу.

Машиналарын яңага алыштыру ниятләре дә булган. “Авылда яшәгәч, гел йә тегесен корып, монысын төзеп куябыз. Машинага чират җитми иде. Быел ел ахырында булса да яңартырбыз дигән идек. Аллаһның рәхмәте белән яңа машиналы да булып куйдык”, – ди Алсу.