«Машинага азык-төлекне төне буе тутырдык, иртәнге 2 сәгатьтә Казанга кузгалдык...»

Спас, Менделеев, Аксубай, Зәй, Яңа Чишмә, Балык Бистәсе, Лаеш, Арча, Балтач, Югары Ослан, Кайбыч районнары авыл җирлекләре, фермерлары, шулай ук агропредприятиеләр ярминкәгә килгән. Сәүдә рәтләрендәге өстәлләргә ит, казылык, яшелчә тау кадәрле өеп куелган. Сөт һәм сөт продуктлары тезелгән. Һич ялгансыз, сәүдә рәтләренең муллыгына ышынмасагыз үзегез шимбә көннәрендә оештырыла торган авыл хуҗалыгы ярминкәләренә чыгып карагыз. Казанлыларның күбесе ит сатып ала. Әледән-әле әбиләрнең:"Итләр бигрәк кыйбат",­- дигән зарланулы авазлары кайтаваз шикелле  колакка сарыла-сарылуын. Терлекне карап, ашатып-эчертеп үстерергә дә кирәк шул.

Кайбыч районының Кошман җирле үзидарәсе рәисе Лилия Сафина белән җирле үзидарәнең башкарма комитеты секретаре Гөлнара Нәфыйкова бәрәңге һәм яшелчәләр төяп килгәннәр.
- Машинага азык-төлекне төне буе тутырдык, иртәнге 2 сәгатьтә Казанга кузгалдык. Иртәнге 6 сәгатькә бәрәңгеләрне алып та бетерделәр. Безнең җирле үзидарәгә Кошман белән Урсак урманчылык бистәсе керә. Кошманда 280 йорт исәпләнә, 713 кеше яши. Мәктәптә 86 бала укый, 50 сабыйга бакча эшли. Халкыбыз хезмәт сөючән, бу яшелчәләр авыл бакчаларыннан. Казан халкы да уңышларыбыздан авыз итсен, - ди Лилия Сафина.

Сәүдә рәтләре белән танышып йөргәндә хатын-кызлар чәрелдәшкән, этләр өргән тарафка борылып карадык. Бактың исә, бер кечкенә эт зур гәүдәле эттән куркып, чәң-чәң өрә. Җәнлекләрнең икесе дә борынчаксыз. "Этләр ияртеп ярминкә мәйданында халык арасында йөрисе түгел инде", - дип шаулашты шул тирәдәге кешеләр. Дөрестән дә, ярминкәдә борынчаксыз эт ияртеп йөрергә ярамый инде. 

Татарстан Хөкүмәте карары нигезендәге авыл хуҗалыгы ярминкәләре декабрь ахырына кадәр дәвам итә. Сәүдә челтәрләрендәгедән, барыбер дә, 15-20 процентка арзангарак бәяләрдә азык-төлек алып куярга тырышыгыз.

Ярминкәдәге бәяләр (килограммнарда)
Сыер ите - 580-800 сум,
Каз - 700 сум,
Тавык - 350-370 сум,
Үрдәк - 650 сум,
Бәрәңге - 25 сум,
Кәбестә - 20- 35 сум,
Кишер - 25 сум,
Суган - 35 сум,
Кабак - 30 сум,
Он - 27 сум 50 тиен,
Йомырка (дистәсе) - 95-125 сум.