Медиа-Питрау: Питрау чәйләре белән сыйланып, түгәрәк уенда катнаштык

– Без бик нык әзерләндек. Редакция журналистлары хәтта Питрау чәйләре дә әзерләде. Урман-кырларга чыгып, киптереп, әзерләп куйдык. Күңел ачыгыз, – диде “Туганайлар” мәдәни-агарту газетасы баш мөхәррире Юлия Губина.
Питрау – православие буенча, апостоллар Петр һәм Павелның газапларын искә ала торган көн. Питрау, шулай ук, җәйнең кыл уртасы да.

– “Туганайлар” редакциясе минем өчен бик якын. Анда 10 ел баш мөхәррир вазифаларын башкардым, шуңа бу бәйрәмгә ашкынып, шатланып килдем. “Татмедиа” җитәкчелегенә редакциягә бәйрәм оештырырга ярдәм иткәннәре өчен рәхмәт. Питрау календарь буенча 12 июль билгеләп үтелә. Керәшеннәрдә бу атнаны – бәйрәм атнасы дип атыйлар. Шуңа күрә көн саен диярлек бәйрәм чараларын үткәрәбез. Питрауны 18 июль Мамадыш районы Җөри авылында озатабыз. Барыгызны да көтеп калабыз, – диде Керәшеннәрнең иҗтимагый үзәге рәисе, Яков Емельянов исемендәге мәдәни үзәк җитәкчесе Людмила Белоусова.

Бәйрәмдә “Бәрмәнчек” дәүләт фольклор ансамбле, “Казансу” һәм “Тумар” ансамбльләре, татар эстрадасы җырчысы Алинә Давыдова, шулай ук Алинә Әхмәтшина, Анастасия Иванова, Евгений Максимов та чыгыш ясады.