“Муса Җәлил исеме мәңге сакланачак!”: бөек шагыйрьнең тууына 120 ел тулуга багышланган чаралар узды

Иртән Казанда 1 Май мәйданында Муса Җәлил һәйкәленә чәчәкләр салдылар. Чарада Татарстан Республикасы Рәисе Рөстәм Миңнеханов, ТР Дәүләт Киңәшчесе Минтимер Шәймиев, Дәүләт Советы Рәисе Фәрит Мөхәммәтшин, Дәүләт Советы депутатлары Марат Әхмәтов, Ркаил Зәйдуллин, Азат Хамаев, Илгиз Зәйниев, Ренат Вәлиуллин, Казан мэры Илсур Метшин, Муса Җәлилнең кызы Чулпан Җәлилова, киң җәмәгатьчелек вәкилләре катнашты.

Татарстанның милли музеенда “Төп нөсхә көне” узды. Озак еллар дәвамында Татарстан Республикасы Милли музее тарафыннан шагыйрьнең тоткынлыкта язылган шигырьләр дәфтәрен киң җәмәгатьчелеккә тәкъдим итү традициясе бар. Бүген дә моабит дәфтәрләренең оригиналын тантаналы рәвештә Муса Җәлилнең кызы Чулпан Җәлилова чыгарды. Бу ике жыентыкта 93 шигырь язылган, аларның күбесе дөньяның 60тан артык телләренә тәрҗемә ителгән. 

— Бу тормышның мәгънәсе — батырлыкны рәхмәт көтеп түгел, ә күңел ихтыяры белән кылуда. Халык һәм киләчәк буыннарның иминлеге өчен үзләрен фида кыла алган шәхесләр һәрчак кирәк, —  диде Татарстан Республикасы мәдәният министры Ирада Әюпова, — Муса Җәлил исеме мәңге сакланачак! Безнең халык өчен хәтер гади генә сүз түгел, ул безнең халкыбызның киләчәге булу гарантиясе.

Чарада «Җәлил» операсыннан фрагмент башкарылды, «Җәлил укулары» халыкара әдәби конкурсында җиңүчеләр Муса Җәлил шигырьләрен татар, рус, төрек телләрендә сөйләделәр. 

Килгән кунакларны герой-шагыйрьнең кызы Чулпан Җәлилова сәламләде: 
— Муса Җәлил бик кыска гомер кичерде, ләкин шул аз гына вакыт эчендә зур эшләр башкарырга өлгерде. Сугышка ул инде танылган шагыйрь булып китте һәм ахыргы сулышына кадәр иҗатчы булып калды. Аның ике дәфтәренең туган илгә кайтып җитүе — чын могҗиза. Муса Җәлил исеменә яла ягылган авыр еллардан соң, бу дәфтәрләрне күрү зур шатлык иде. Беренче тапкыр, әнием белән шул дәфтәрләрне күргәч, еладык, шул ук вакытта бу безнең өчен иң бәхетле мизгел иде, — диде ул.