Роспотребнадзор идарәсе: “Быел белем бирү хезмәтләреннән еш зарланалар”

– Аларның 57 проценты кулланучылар хокукларын яклау белән бәйле булса, 36 проценты – азык-төлек һәм азык-төлек булмаган товарларның сыйфатына кагылышлы шикаятьләр. Калган мөрәҗәгатьләр күрсәтелә торган төрле хезмәтләргә кагыла. Быел аеруча белем бирү хезмәтләреннән еш зарланалар, алар гомуми мөрәҗәгатьләр санының 19 процентын тәшкил итә. Узган елның шул ук чоры белән чагыштырганда, мондый шикаятьләр дүрт тапкырга артты, – дип билгеләп үтте Роспотребнадзорның Татарстан буенча идарәсе җитәкчесе урынбасары Юлия Булатова матбугат очрашуында.

Халык аеруча онлайн-укытуның сыйфатына зарлана. Иң күп дәгъвалар исә "Эдэкс" һәм "Айти решения" компанияләренә белдерелгән. “Килешү төзегәндә ташламалар һәм алга таба эшкә урнаштыру мөмкинлеге булачак дип вәгъдә иткәннәр, әмма шартлары үзгәргән. Гражданнар белем алу өчен кредитлар алган булган, әмма әлеге компанияләр үз өсләренә алган җаваплылыкны үтәмәгәнлектән, килешүне өзәргә һәм акчаларны кайтарырга карар кылгач, моны теләмичә генә башкарганнар, ә соңыннан бөтенләй элемтәгә керми башлаганнар”, – дип сөйләде Юлия Булатова.

Сервис үзәкләренә карата да шикаятьләр бар. Әйтик, көнкүреш техникасы һәм компьютер ремонтлау буенча махсуслашкан бер үзәк төзәтергә алган техниканы озак кына кире кайтармаган һәм эше дә сыйфатсыз булган. Роспотребнадзор шулай ук күзлекләр ясаучы эшмәкәргә карата да дәгъва әзерли.

– Безгә мөрәҗәгать итүчеләр аларга күзләренең күрү сәләтен бушка тикшерергә тәкъдим итүләрен, ә аннары, кирәк булмаган очракта да, күзлек сатып алуны көчләп тагулары турында белдерделәр. Әмма түләү сатучыларның шәхси карталары аша башкарылган, шуңа күрә сатып алучылар шикаять белән мөрәҗәгать иткәндә, кибет элемтәгә кермәгән һәм дәгъвалар кабул итмәгән. Эшмәкәр адресына биш кисәтү җибәрелде, билгесез кулланучылар даирәсенең хокукларын яклау турында дәгъва бар. Гражданнарга сыйфатсыз хезмәтләр күрсәтелгәндә килешүне өзәргә, ә инде икенче як моның белән ризалашмаса, Роспотребнадзорга мөрәҗәгать итәргә кирәк, – диде спикер.