Рөстәм Миңнеханов Маскатта OMNEX 2026 Оман халыкара сәүдә күргәзмәсен ачу тантанасында катнашты

Татарстан күргәзмәдә беренче тапкыр катнаша һәм үз стендын тәкъдим итте. Рәсми ачылышка кадәр күргәзмәне Оман Солтаны гаиләсе вәкилләре, шул исәптән Галиҗәнап Сәид Фәйсал бән Төрки бән Мәхмүт Әл Сәид, шулай ук Бөтендөнья этноспорт конфедерациясе президенты, Төркия Президенты улы Билал Эрдоган һәм башка рәсми затлар – форумда катнашучылар карады. OMNEX 2026 бер мәйданчыкта халыкара компанияләрне, дәүләт эшлеклеләрен, инвесторларны һәм инновацион тармак вәкилләрен берләштергән.

Ачылу тантанасы кысаларында Рөстәм Миңнеханов күргәзмәдә катнашучылар алдында чыгыш ясады. Ул оештыручыларга чакырулары өчен рәхмәт белдерде һәм Татарстанның инновацияләргә һәм заманча технологияләргә нигезләнгән үсеш алган икътисадлы төбәк булуын, яңа алымнар кертеп, дөньяның иң яхшы практикаларын эзлекле рәвештә өйрәнүен билгеләп үтте. Аның сүзләренчә, инвесторларны җәлеп итү республиканың төп бурычларыннан берсе булып кала.

Татарстан Рәисе шулай ук төбәктә инвесторлар өчен тудырылган шартлар турында сөйләде һәм Оман бизнесы вәкилләрен республикага килергә чакырды. Үз чыгышында ул партнерлык финанславы темасына аерым игътибар бирде, Казанда Ислам финанс институтлары өчен бухгалтерлык исәбе һәм аудит буенча оешманың дөньядагы беренче вәкиллеге ачылуын ассызыклады (AAOIFI).

Рөстәм Миңнеханов билгеләп үткәнчә, Татарстан базарында республика белгечләре тарафыннан эшләнгән һәм әлеге оешмада сертификацияләнгән ислам финанславының барлык төп продуктлары тәкъдим ителгән.

Форумда катнашучыларны ул «Россия – Ислам дөньясы: KazanForum» халыкара икътисадый форумында катнашырга чакырды. Ул ассызыклаганча, ислам дөньясы илләре Татарстан тышкы эшчәнлегенең иң мөһим юнәлешләренең берсе булып кала.

Республика мөселман дәүләтләре партнерлары белән сәүдә-икътисадый һәм мәдәни өлкәләрдә актив хезмәттәшлек итә. Рөстәм Миңнеханов искәрткәнчә, ул ил җитәкчелеге кушуы буенча «Россия – Ислам дөньясы» стратегик караш төркемен җитәкли.

ТР Рәисе Матбугат хезмәте