Рөстәм Миңнеханов татар эшмәкәрләренә: “Сез булмасагыз, авылның киләчәге юк”

– Кадерле милләттәшләр, сезнең белән очрашкан саен, күңелдә яхшы хисләр туа. Һәрбер чыгыш ясаучы үзенең эше, бизнесы турында татар телендә сөйләде. Тел, гореф-гадәт, динебезгә битараф булмаган кешеләр җыелган монда. Сез безгә рәхмәт укымагыз, без сезгә рәхмәт укыйбыз. Сез булмасагыз, халыкка эш юк һәм авылның да киләчәге юк. Эшегезне алып барасыз, башкаларны да эшле итәсез. Эшмәкәр булмаса, эш тә юк, авылның да киләчәге юк. Әгәр авылларда мәчетләр булмаса, гореф-гадәтләребезне, телебезне ничек саклап кала алабыз? Мәктәпләрдә үз телебездә укыту оештырылмаса, әлбәттә, милләтебезне югалтабыз. Бу эштә сез – безнең таяныч. Сез әйткән сүзләрне язып барып, аларны тормышка ашырсак, сездә булган үрнәкне бер-беребезгә тапшыра алсак, без бик шат. Һәммәгезгә исәнлек-саулык телим, күрешергә,  бергә эшләргә насыйп булсын, – диде ул.