Сиксән елдан соң шатлыклы-моңсу кайтаваз

Сугыш һәм тыл ветераннарына Бөек Ватан сугышында Җиңүнең 80 еллыгына багышланган юбилей медале тапшырыла башланды. Россия Президенты Владимир Путинның 2024 елның 2 сентябрендәге указы нигезендә чыгарылды әлеге истәлекле медаль.

Балык Бистәсе районы Башкарма комитеты җитәкчесе Данис Сатдинов, район җитәкчелеге исеменнән котлап, Балтач авылының тыл ветераннарына Бөек Җиңүнең 80 еллыгы юбилей медальләре тапшырды.

– Сугыш елларында җиңү хакына фидакарьләрчә эшләгәнсез. Бүгенге буыннарның сезгә хөрмәте һәм рәхмәте зур, – диде Данис Сатдинов Балтач авылының тыл ветераны Галия Зыятдинованы бүләкләгәндә.

1932 елда туган Галия апа Зыятдинова бер шатланды, бер моңсуланды бу хәлләргә.

– Ачлыгын да, ялангачлыгын да кичерде халык сугыш елларында. Ләкин, олысы-кечесе эштә булды. Безне онытмаганнары өчен җитәкчеләргә рәхмәт! Аллага шөкер, бүгенге тормышлар бик рәхәт, – диде Галия апа.

Хезмәтенә җаваплы караган, башкаларга үрнәк булып торган Галия Зыятдинованы үз вакытында район Советына депутат итеп тә сайлаганнар. Галия белән Миргазиз Зыятдиновлар өч балалары – Гүзәлия, Азалия, Вәкилне үзләре кебек үк тырыш итеп тәрбияләп үстергәннәр. Кызганыч, Миргазиз ага инде арабызда юк.

– Бөек Ватан сугышына Ямаш авылыннан 259 кеше киткән, аларның 156сы һәлак булган. Балтач авылыннан фронтка алынган 277 кешенең 147се яу кырыннан кайта алмаган, – диде Балтач авылы җирле үзидарәсе башлыгы Харис Гатиятов.
Ямаш авылыннан сугыш ветераны Мирзахан Әхмәтов исән, ә Балтачта андыйлар инде юк. Балтач авылындагы тыл ветераннары да санаулы гына калды. Болар: Галия Зыятдинова, Нурлыбанат Зыятдинова, Мәсрүрә Сөниева, Габделхәй Сөниев, Хәмит Фәрзетдинов, Нурлыбанат Мостафина, Сәйха Сафина, Хәтимә Гыйләҗева. Ямашта бердәнбер исән тыл ветераны, ул –Фаягөл Дәүләтшина.
– Балаларда ватанпәрвәрлек тәрбияләгәндә Бөек Ватан сугышында һәм хәзер махсус хәрби операциядә катнашкан батырларны үрнәк итеп куябыз, – диде Балтач авылы мәктәбе директоры Нияз Гарипов.