Тарихның сакчылары да һәм дошманнары да бар

Татарстанда 5 меңнән артык тарихи бина, корылма, археологик җирлек мәдәни мирас булып санала. Шулардан 2030 мәдәни мирас объекты Россия Федерациясе халыкларының мәдәни мирас объектларының бердәм дәүләт реестрына кертелгән.

Саннар һәм фактлар
Республикадагы мәдәни мирасның федераль әһәмиятендәгеләр – 473, төбәк әһәмиятендәгеләр – 1200 һәм җирле әһәмияттәгеләр – 357. Тарихи җирлекләр: Казан, Биләр, Болгар, Алабуга, Чистай, Бөгелмә, Буа, Лаеш, Мамадыш, Менделеевск, Минзәлә, Зөя, Тәтеш. 305 урын – археологик мирас. Казан Кремле, Болгар, Успение соборы һәм Зөя утрау шәһәрлеге монастыре, Казан федераль университетының астрономия обсерваторияләре ЮНЕСКОның Бөтендөнья мирасы объектлары исемлегенә кертелгән.

Гыйбадәтханәләргә халык ярдәме
– Татарстан Рәисе Рөстәм Миңнеханов теләктәшлегендә Биектау районының Айбаш авылындагы агач мәчеткә капиталь төзекләндерү үткәрелде. 2022 елдагы давылда аның манарасы да авып төшкән иде. Айбаш авылы мәчетен, шулай ук Кукмара районының Мәчкәрә авылы мәчетен төзекләндерүдә халык акча җыешып, булышты. Зәй районының Югары Багряж авылында агач чиркәүне төзекләндерү тәмамлану алдында. Халык гыйбадәтханәләрне төзекләндерүдә акчалата ярдәм күрсәтсә, бу бик тә игелекле гамәл булыр, – диде Татарстан Республикасының мәдәни мирас объектларын саклау буенча комитеты рәисе Иван Гущин “Татар-информ” мәгълүмат агентлыгында үткәрелгән матбугат конференциясендә.

Быелга планнар
Татарстанда быел 66 мәдәни мирас объектын төзекләндерү каралган. Мисал өчен, Мамадышта сәүдәгәр Шәяхмәтов йорты яңартыла, анда музей булачак. Кукмарадагы Бертуган Комаровлар фабрикасы конторасы бинасына төзекләндерелгәннән соң, итек музее урнашачак. Казанда Шәрыкъ клубы (Яшь тамашачы театры), Главпачтамт төзекләндерелә. Александров пассажына авариягә каршы ныгытулар үткәрелә.

– Казанның Х. Атласи урамы,2 һәм Волков урамы,54 адресларындагы агач торак йортларда янгын булды. Киров районының Токарная урамы,5 адресындагы йорт сүтеп ташланды, тарихи мирас юкка чыгарылды. Бу фактлар хокук саклау органнарына тапшырылды, – диде Иван Гущин.

Билгеле булганча, Татарстанда «Туризм һәм кунакчыллык» илкүләм проекты гамәлгә ашырыла.