Татарстанда ике һәм аннан да күбрәк балалы гаиләләргә ел саен 25 мең сумнан түләү билгеләнә

Татарстанда 25 меңнән артык гаилә түләү алган

Россия Социаль фондының Татарстан буенча бүлеге мәгълүматларына караганда, 1 июньнән башлап республикада 25 меңнән артык гаиләгә яңа түләү билгеләнгән.

— Яңа түләү — ике һәм аннан да күбрәк бала тәрбияләүче гаиләләргә реаль ярдәм күрсәтү. Без ата-аналарның яңа чара белән актив кызыксынуларын күрәбез, — диде Россия Социаль фондының Татарстан буенча бүлеге идарәчесе Эдуард Вафин.

Кемнәр 25 мең сумлык түләүгә дәгъва итә ала?

Яңа ярдәм чарасы елга бер тапкыр ике һәм аннан да күбрәк бала тәрбияләүче эшләүче ата-аналарга бирелә.

Түләүгә түбәндәге шартларга туры килгән гаиләләр дәгъва итә ала:

* балалары 18 яшькә кадәр булырга тиеш;

* бала көндезге бүлектә белем алса, яшь чиге 23 яшькә кадәр;

* гаиләнең җан башына уртача кереме билгеләнгән чиктән артмаска тиеш.

Татарстанда 2026 ел өчен әлеге керем чиге 22 609,50 сум тәшкил итә.

Түләүне кем рәсмиләштерә ала?

Түләүне алдагы елда керемнәреннән НДФЛ түләгән ата-ана рәсмиләштерә ала. Шул ук вакытта ата-аналарның рәсми никахта торуы яки балалар белән бергә яшәве мәҗбүри шарт түгел. Билгеләнгән таләпләр үтәлгән очракта, ата-ананың һәрберсе түләү өчен мөстәкыйль рәвештә мөрәҗәгать итә ала.   

Гаиләнең кереме һәм милке дә исәпкә алына

Гаризаны караганда, Социаль фонд белгечләре гаиләнең керемен һәм мөлкәти хәлен бәяли. Хисаплаганда хезмәт хакы, пенсияләр, пособиеләр, алиментлар, стипендияләр һәм башка керемнәр исәпкә алына. Моннан тыш, мөлкәти критерий дә кулланыла. Ягъни гаилә милкендәге күчемсез милек һәм транспорт чаралары саны билгеләнгән нормалардан артмаска тиеш.

Түләү суммасы ничек исәпләнә?

Түләү күләме ата-ананың керемнәреннән түләнгән НДФЛ суммасы белән 6 процент ставкасы буенча исәпләнгән салым арасындагы аерма нигезендә билгеләнә. Шуңа күрә һәр гаилә өчен түләү күләме аерым исәпләнә.

Кемнәргә түләү бирелми?

Әгәр үзмәшгульләрнең яки шәхси эшмәкәрләрнең НДФЛ салына торган керемнәре булмаса, алар махсус салым режимнары кысаларында әлеге түләүгә дәгъва итә алмый. Шулай ук алимент буенча бурычы булган ата-аналарга һәм ата-ана хокукларыннан мәхрүм ителгән гражданнарга ярдәм чарасы күрсәтелми.

Түләү өчен кайчан һәм кайда гариза бирергә?

Түләүгә гаризалар 2026 елның 1 июненнән 1 октябренә кадәр кабул ителә.

Гаризаны түбәндәге ысулларның берсе белән бирергә мөмкин:

* «Госуслуги» порталы аша;

* күпфункцияле үзәкләрдә (МФЦ);

* Россия Социаль фондының Татарстан буенча бүлеге клиент хезмәтләрендә.

Әлеге түләү — Татарстандагы ике һәм аннан да күбрәк балалы гаиләләргә 2026 елда күрсәтелә торган яңа социаль ярдәм чараларының берсе.