“Татарстанга Луганск халкы исеменнән рәхмәт!” – диде Луганск яшьләре

Аның максаты – Татарстан Республикасы белән Луганск Халык Республикасы яшь белгечләренең төбәкара хезмәттәшлеген үстерү.

– Татарстан Хөкүмәте теләктәшлегендә үткәрелә бу форум. Республикадан меңнәрчә белгеч Лисичанск һәм Рубежное шәһәрләрен төзекләндерүдә эшли. Луганск студентлары бездә белем ала, соңыннан туган төбәкләренә кайтырга телиләр. Бездәге “КАМАЗ” җәмгыятендә эшләүчеләр дә бар. Студентларның төзелеш отрядлары да төзекләндерүләрдә катнаша, – диде республиканың яшьләр эшләре буенча министрының беренче урынбасары Софья Галиева-Мостафина “Татар-информ” мәгълүмат агентлыгында үткәрелгән матбугат конференциясендә.

Татарстан Министрлар кабинеты каршындагы Яшьләр хөкүмәте рәисе, махсус хәрби операциядә катнашкан Игорь Жерненков сөйләгәнчә, ике республика яшьләре тәҗрибә уртаклаша. 

– Лугансктан 40 кеше килде. Алар бездәге мәгариф, эшкуарлык, спорт, дәүләт сатып алулары эшчәнлеген өйрәнә. Иннополис шәһәрчегенә, Казан Кремленә һәм башка тарихи урыннарга экскурсияләр оештырыла, – диде Игорь Жерненков. 

– Россия составына кергәч, бездә яшьләр белән эшләү нык яхшырды. Лисичанск һәм Рубежное шәһәрләрендә инфраструктураны төзекләндерүләре өчен Татарстанга Луганск халкы исеменнән зур рәхмәт! – диде “Бердәм Россия”нең “Яшьләр гвардиясе” Бөтенроссия иҗтимагый хәрәкәтенең Луганск төбәк бүлеге җитәкчесе урынбасары Дарья Плетенецкая.

Рубежное шәһәренең тарих укытучысы, форумда канашучы Дмитрий Емчук та үзенең чыгышын төзү-төзекләндерү эшләрендәге ярдәме өчен Татарстанга рәхмәт әйтүдән башлады.

– Россия составына кушылганнан соң безнең иркенләп рус телендә сөйләшү-аралашу хокукы барлыкка килде. Мәктәпләрнең матди-техник базасы яхшыртыла, Россиянең чын тарихын өйрәнә алабыз. Казан – борынгы, искиткеч матур шәһәр. Һәр урында туганнарча җылы мөнәсәбәт күрәбез.  Монда килеп, уку-тәҗрибә алу мөмкинлеге тудырганы өчен Татарстан җитәкчелегенә рәхмәт! – диде Дмитрий Емчук.