Татарстанлыларга 10 мең эш урыны тәкъдим ителә: күңелгә ятышлысын сайлап алыгыз

– Бүген дә 49,2 мең эш урыны бар. Рәсми рәвештә 3 мең 600 кеше генә эшсез булып теркәлгән. Пенсиягә чыгулар сәбәпле, ел саен 51,37 мең кешегә алмаш булдырып бару зарур. Предприятиеләр үзләренә кирәкле кадрлар өчен югары уку йортларына 2027 елның “квота”сына гаризалар җибәрә башлады инде, әлеге мәсьәләдә вакытны ычкындырмаска кирәк. Татарстанга чит илләрдән быел төрле тармакларда эшләргә 15 мең кеше чакырылды, – диде Татарстанның хезмәт, халыкны эш белән тәэмин итү һәм социаль яклау министры урынбасары Клара Таҗетдинова “Татар-информ” мәгълүмат агентлыгында үткәрелгән матбугат конференциясендә.

Казанда 17 апрельдә УНИКС залында 9.30 – 14.00 сәгатьләрдә “Работа России” Бөтенроссия эшкә урнашу ярминкәсенең төбәк этабы була. Бу көнне хезмәт ярминкәсе Чаллы, Түбән Кама, Әлмәт, Яшел Үзән, Лениногорск, Бөгелмә шәһәрләрендә, барлыгы 45 мәйданда оештырыла.

– Республикадагы 350 предприятие 10 мең вакансия тәкъдим итә. Эш урыннарындагы уртача хезмәт хаклары 60 мең сумнан 150 мең сумга кадәр, – диде “Работа России”ның Татарстандагы кадрлар үзәге директоры Тимур Муллин.

Казан федераль университетының карьера үзәге җитәкчесе Вячеслав Сәйдашев  әйткәнчә, 17 апрельдә УНИКСта студентлар өчен дә файдалы чаралар планлаштырылган.

Билгеле булганча, Татарстанда «Кадрлар» илкүләм проекты гамәлгә ашырыла.