Халык хәзер автосәяхәтне хуп күрә

– Башкалада ике һәм аннан да күбрәк көнгә тукталучылар саны 10,3 процентка артты. Туристларның 75 проценты Россия төбәкләреннән. Сан белән исәпләгәндә – 2,5 миллион кеше. Россия төбәкләреннән килүчеләр 5 процентка артты. Мәскәү белән Санкт-Петербург шәһәрләре халкы Казанга аеруча еш килә. Башкортстан, Чувашия, Марий Эл, Удмуртия республикаларыннан, шулай ук Мәскәү, Ульяновск, Свердловск, Самара өлкәләре дә Казанны якын күрә. Үзәк федераль округ өлкәләреннән, Уралдан, Түбән Новгородтан, Киров өлкәсеннән Казанга килүчеләр саны күрсәткече сизелеп яхшырды, – дип хәбәр итте Казан шәһәре Башкарма комитетының туристлыкны үстерү буенча комитеты директоры Дарья Санникова “эшлекле дүшәмбе” киңәшмәсендә.

Чит илләрдән турист сыйфатында Казанга килүчеләр күрсәткече 30 меңне узган. Аларның күпчелеге Кытай, Төркия, Белоруссия, Казахстан һәм Малайзиядән. Туристларның Казанда тукталулары уртача 3 көнне тәшкил итә.

Сбераналитика мәгълүматларына караганда, туристлар һәм экскурсияләргә килүчеләр быелның 8 аенда Казанда 29,1 миллиард сум акча тоткан. Барлык туристлар санына бүлеп исәпләгәндә, һәр кеше көн саен уртача 3,27 мең сум түләгән. “Сәяхәт икән сәяхәт, ял икән ял булсын”, дигәндәй, туристлар Казанның кафеларында, барларында һәм рестораннарында акча кызгынмый.