Хәзер һәр ата-аналар сабыйлары белән бергә сәяхәт итә алачак

Яңа Федераль закон 12 яшькә кадәрге балалары булган ата-аналарга илебез авиакомпанияләре самолетларында уңайлы сәяхәт гарантияли. Россия Федерациясе Транспорт министрлыгының 2025 елның 21 гыйнварыннан үз көченә кергән 2024 елның 25 декабрендәге 462 номерлы боерыгы нигезендә, пассажирлар үзләренең кечкенә балалары бер рәттә күрше урыннарда утырырга хокуклы.

Яңа хокуктан ничек файдаланырга?

Самолетка теркәлү узганда пассажир, 462 нче боерыкка сылтама ясап, бала янында буш урын тәэмин итүне сорап, авиакомпания хезмәткәренә мөрәҗәгать итәргә хокуклы. Шунысын да билгеләп үтәргә кирәк, хезмәт, күрше кәнәфиләрнең тарифлары аермасына карамастан, бөтенләй бушлай күрсәтелә.

Әгәр авиакомпания вәкиле әлеге хокукны бирүдән баш тартса, сезгә язма рәвештә оешмадан баш тартуны сорарга киңәш ителә. Соңыннан бу Росавиация яки Роспотребнадзор кебек контроль органнарына авиакомпаниягә шикаять бирү өчен нигез булачак.

Бу үз хокукларыңны нәтиҗәле якларга һәм утырту процессында гаилә әгъзаларының аерылуы нәтиҗәсендә килеп чыга торган уңайсызлыкларны булдырмаска мөмкинлек бирәчәк.

Канунны бозган өчен җаваплылык

Яңа кагыйдәне үтәмәгән өчен авиакомпанияләргә җитди санкцияләр яный. Административ хокук бозулар турында Россия Федерациясе кодексының 14.8 маддәсе буенча Кулланучылар хокукларын бозган өчен җәза каралган. Вазыйфаи затлар — 20 мең сумга кадәр, юридик затлар 50 мең сумга кадәр штраф түләргә мөмкин.

Моннан тыш, әгәр компания таләпне ирекле рәвештә канәгатьләндерүдән баш тарта икән, кулланучылар хокукларын яклау турындагы закон нигезендә, зыян күргән ата-аналар әхлакый зыянны компенсацияләүне һәм авиабилет бәясенең бер өлешен кире кайтаруны таләп итә алачак. Суд практикасы күрсәткәнчә, өлкән пассажирны һәм баланы аерым урнаштырган өчен компенсация 5 меңнән 15 мең сумга кадәр булырга мөмкин.

Шулай ук рейсларны тоткарлау, багажны югалту һәм персоналның тупас мөнәсәбәте өчен җаваплылык каралган, мондый очраклар буенча түләүләр суммасы эш шартларына бәйле рәвештә 3 меңнән 50 мең сумга кадәр үзгәрергә мөмкин.

Яңа канунның мөһим моментлары:

- әлеге кагыйдә барлык Россия авиакомпанияләренә карый, шул исәптән бюджетлы рейсларга да («лоукостларга»);

- күрше кәнәфинең бәясе югарырак булса да, әлеге хезмәтне сезгә бушлай күрсәтергә тиешләр;

- яшь буенча чикләүләр: 12 яшькә кадәрге балалар гаиләнең өлкән әгъзасы янында мәҗбүри урнаштырылырга тиеш;

- чит ил авиакомпанияләренә дә карый, ягъни Россиядән очучы халыкара рейслар да әлеге законнарга буйсынырга тиешле.

Шул рәвешле, яңа закон балалы гаиләләр өчен куркынычсызлык һәм сәяхәт уңайлылыгын тәэмин итә, буш урыннар эзләү яки урнаштыруны үзгәртү өчен өстәмә түләүләр кирәклеген бетерә. Хәзер һәр ата-аналар сабыйлары белән бергә сәяхәт итә һәм үзләренә юлда тынычлык һәм уңайлылык тәэмин итә алачак.

Лилия Яфизова