7нче тапкыр Бал туе: Шекшедә умартачылар бәйрәме узды

Россиянең 7 төбәгеннән кортчылар җыелды

Төбәкара Бал туена кунакка килүчеләр бик күп иде. Бердән, кортчылар бирегә килүне зур мәртәбә саный. Үзара сөйләшәләр, танышалар, тәҗрибә уртаклашалар. Ераклардан килүчеләрне кичтән үк кабул итәләр. Икенчедән, умартачылык кебек кәсептә нинди сынаулар узмый алар. Бал туенда да эш барышында була торган рам ясау кебек четерекле эшләр буенча да ярышлар уздырылды. Балның тәме һәм сыйфаты буенча да комиссия тикшерүенә балларын тапшыручылар шактый күп булды. Бирегә кадәр килгәч-килгәч, ярышмыйча да булмый.

– Бал туенча Россиянең 7 төбәгеннән, Татарстан районнарыннан кортчылар җыелды. Ел саен зурая барабыз. Бәйрәмгә кибетләр дә килде. Бал сату рәтләре артканнан-арта бара, – дип сөйли шушы чараларны оештыручы Шекше авылы җирлеге башлыгы Радик Хәйртдинов.

Чыннан да, бал ярминкәсендә җаның теләгән теләсә кайсы балның тәмен татып карарга, сатып алырга була иде.

Умартачылык тармагы елдан-ел киңәя

Саба районының авыл хуҗалыгы идарәсе җитәкчесе Гафур Хәсәншин белдергәнчә, умартачылык бәйрәме елдан-ел киңрәк көч ала.

– Безнең район умартачылары да, башка районнардан да бик теләп киләләр. Чит өлкәләрдән дә килүчеләр бар. Районыбызда умартачылык тармагы тотрыклы. Елның-елында өлкән умартачылар янына яшьрәкләре кушыла. Күбрәк инде хәзер шәхси хуҗалыкларда умартачылык тарала. Безнең авыл хуҗалыгы оешмаларында да умартачылык яшәп килә. Умарта – табигатьнең бер могҗизасы. Аның файдасын барыбыз да беләбез. Авыл хуҗалыгы тармагында да культураларны серкәләндерүдә, үстерүдә һәм урман өчен зур әһәмияткә ия. Шуңа да умартачылык тармагын сакларга тырышабыз, – диде ул.

Быел авыл хуҗалыгында кулланыла торган химикатлар белән агулану очраклары булмавын да искәртеп үтте ул. Таләпләр күбрәк куела. Аннан агрономнар да умартачылар белән килешеп эшли башладылар.

 Бал ярминкәсендә иң тәмле балны сайладылар

Бал туена көннең дә иң матуры туры килде. Бал җыя торган рәхәт көн булды. Бер мәйданга бал ризыклары гына түгел, бөтен тирә-яктан бал кортлары да җыелган иде, ахрысы. Халык та бал корты күбрәк җыелган балларны сайлый башлады.

– Бәйрәмнең үтүе – шушы бал продукциясенә бәйләнгән. Халык бал алсын, халык ял итсен, – ди берничә ел рәттән шушындый масштаблы Бал туен уздыручы Радик Хәйртдинов.