Кар, чәй һәм күршеләр: Апаста кышкы бәйрәм гөрләде

Бу юлы “Карлы марафон” Салават Каримов урамында урнашкан күпфатирлы йортлар мәйданчыгында оештырылды.

Әлеге чара Татарстанда «Күрше» фестиваленең кышкы сезоны кысаларында гамәлгә ашырыла. Быел республиканың шәһәр һәм районнарыннан 49 проектка кышкы бәйрәмнәр уздыру өчен грантлар бирелде, җиңүчеләр арасында Апас районы да бар. Проектны җирле “Алдынгылар хәрәкәте” бүлеге тормышка ашыра.

Карлы буранга һәм салкын һава торышына карамастан, бәйрәмгә олысы-кечесе бик теләп кушылды. Район мәдәният хезмәткәрләре, “Каратун йолдызлары” иҗат төркеме һәм Ранис Сайфутдинов җыелган халыкка дәртле җырлар бүләк итте.

Бәйрәм кунаклары өчен кабартмалар ясау һәм бизәү буенча мастер-класс оештырылды — һәркем джем белән тәмле кабартмалардан авыз итте. Шулай ук хуш исле үләннәр һәм татлы конфетлар белән кайнар чәй дә тәкъдим ителде.

Мега-зур реквизитлар белән уеннар балаларга гына түгел, өлкәннәргә дә кызыклы булды. Ә оттырышсыз лотерея бәйрәмнең кульминациясенә әверелде: пледлар, логотиплы кружкалар һәм башка истәлекле бүләкләр катнашучыларның кәефен тагын да күтәрде.

— Җәй көне безнең ишегалдында “Күрше” фестивале кысаларында бик матур бәйрәм узган иде. Шуңа күрә кышкы чараны да шатланып көтеп алдык. Күршеләр белән аралаштык, чәй эчтек, балалар рәхәтләнеп уйнады, әле бүләкләр дә эләкте. Чын күңелдән оештырылган бәйрәм булды, — дип уртаклашты Салават Каримов урамында яшәүче Рамилә Камалдинова.

Оештыручылар билгеләп үткәнчә, «Күрше» ишегалды вакыйгалары фестивале — Татарстан Рәисе Рөстәм Миңнеханов инициативасы белән 2025 елның язында старт алган масштаблы грант проекты. Ул «Безнең ишегалды» программасының дәвамы булып тора һәм күршеләр арасында дус-тату мөнәсәбәтләрне ныгытуга, гаилә кыйммәтләрен үстерүгә юнәлтелгән.

Бәйрәмне оештыруда ярдәм күрсәткән район мәдәният йорты хезмәткәрләренә, Апас башкарма комитеты җитәкчесе Луиза Сафинага, күпфатирлы йортлар идарәче компаниясе җитәкчесе Ришат Әхмәтҗановка, “Сәләт” балалар иҗат үзәге җитәкчесе Альбина Хатыповага һәм “Алдынгылар хәрәкәте” волонтерларына рәхмәт белдерелде.

«Күрше» кышкы фестиваленең чираттагы бәйрәме 13 февральдә Табар Черкене мәдәният йорты каршында узачак һәм Май чабу бәйрәменә багышланачак.

Румия Идрисова,

 «Алдынгылар хәрәкәтенең» Апас җирле бүлегенең

өлкән белгече, проект авторы.