Кукмарадан 92 яшьлек әби киңәше: «Кычыткан белән баш юам»

Майның эсселегеннән соң, июньнең көйсезлеген дә кабул итеп булмый. Без генә түгел, табигать тә үзгәрә бара. Үзгәрәбез, тик кайсы якка үзгәргәнебезне үзебез дә чамалап бетерә алмыйбыз бугай. Ә шул гап-гади хакыйкатьне аңлау өчен кешеләр белән күбрәк аралашырга, табигатькә якынаерга кирәк.

Кукмара районы Балыклы авылындагы бер бакчадан яшькелт алъяпкыч бәйләгән матур әбекәйнең (сөбханалла) чыгып килүен күргәч, шаккатып калдым. Минрауза апа чиләк тутырып яшел кычыткан җыйган. Әлеге манзарадан минем кулымдагы пакетларыма кадәр төшеп китте. Мондый чын әбиләр дефицит бит хәзер. 

Яшел кычыткан, яшел алабута ашап та исән калган буын кешеләре бит алар. Ә без һаман табигатьтән ераклашабыз. Әллә нинди БАДлар, ясалма төймәләр эчеп шифа алмакчы, яшәрмәкче булабыз. Әле шуларны мактап, сатарга да омтылабыз. Минрауза апаның яшел кычытканны чәч юарга җыюы икән.

Шуны белгәч, тагын бер гаҗәпләндек. Бала чакта әбинең кычыткан сулары, ромашка чәчкәләрен җыеп чәч юган чаклары искә төште. Әчегән сөт белән юуларны әйтмим дә инде.

– Кычыткан белән баш юам. Гел кычытканны юар өчен җыеп куям. Кычыткан ашын быел пешермәдем. Без аның нормасын үтәдек инде. Сугыш елы баласы бит мин. Сугыштан соң да бик авыр булды. Урманын да кистек, чиләк-көянтә белән тиресен дә түктек. Иң авыр эшләр безгә булды. Колхоз бәрәңгесен дә көрәк белән казып утырттык. Без өч туган үстек. Уртанчы апам авырып үлде. Аны карап озаттым. Ятим үстек без. Әтидән калганда 3тә булганмын. Әни үлгәндә 6 яшем тулмаган иде әле. Нәнә кирәк миңа дип елый-елый аңгырая яздым. Әттә-нәнә дип сөйләшә торган идек. Шундый авырлыклар белән үстек. Хәзер инде ни ашасак, ни эчсәк, ни кисәк тә – шул бар. Тормышыбыз әйбәт. Күп яшәдек, Аллаһка шөкер. Гомернең үкенече калмады, – дип сөйли 92 нче яше белән баручы Минрауза апа Касыймова. 

Олы яшенә карамастан, Минрауза апа Сабантуйга да йөрергә ярата. Һәр көннең матурлыгына сөенеп яши белә, кул сузымындагы табигать нигъмәтләреннән рәхәтләнеп файдалана. Ә сез бераз гына туктап, тирә-якка күз ташлагызчы... Яшел кычыткан җыйдыгызмы, яшел суган өзеп ашадыгызмы? Җәен яшел төсләргә игътибар итәргә бераз гына вакыт табыйкчы?! Ә бит яшел төснең дә әллә никадәр төсмерләре күп.