Нәзлия Гобәева: «Машинаны йөртеп кенә калмыйм, ватылса, төзәтәм дә»

Алар арасында Актаныштан механизатор Нәзлия Гобәева да бар. Оста трактор йөртүче уеннар вакытында ир-атларга мастер-класс та күрсәткән. Япь-яшь кызның тимер атны ничек иярләве турында үзеннән сораштык.

Нәзлиянең эше тыгыз, урак өсте, кырдадыр дисәм, ул бөтенләй Актаныш район мәдәният йортында эшли булып чыкты. Әстерхан сабантуена барырга җыеналар икән. Нәзлия элек райондагы "Агыйдел" ансамблендә дә чыгышлар ясаган, җырлый, бии.

- Кечкенәдән "техника җене" кагылган инде миңа, унсигез яшем тулганчы ук машинага утырдым, без гаиләдә биш бала, әтидән бик яшьли калдык, әни безне ялгызы тәрбияләде. Еш кына ир-ат эшен дә башкарырга туры килә иде. Шуңа да машинаны үз иткәнмендер инде. Хәзер 16 ел руль артында. Машинаны йөртеп кенә калмыйм, ватылса, төзәтәм дә. Профессионал дисәң дә була, - ди Нәзлия.
Ә менә трактор йөрткәне булмаган. Нәкъ менә Бөтенроссия авыл спорт уеннарында катнашу өчен махсус трактор йөртергә өйрәнгән, таныклык алган. 2012 елда трактор йөрти башлауга Чувашиядә узган уеннарда чемпион исемен яулаган. Бүгенгә ул ике тапкыр Россия, ике тапкыр Татарстан чемпионы. Соңгысында бераз сынаттым, ди кыз.

- Уеннарда Россиянең 68 төбәгеннән командалар катнашты, барлыгы 2 меңнән артык спортчы җыелган иде. Татарстан җыелма командасы чынлап та көчле, бердәм булды. Тракторда төрле фигуралы күнегүләр күрсәтергә, йөгерергә һәм гер күтәрергә кирәк иде. Елга бер генә утырып тәҗрибә туплап булмый, машинаны оста йөртсәм дә, трактор хатын-кыз өчен авыррак. Ел да 55әр тапкыр гер күтәрә идем, быел кулым авырту сәбәпле, азрак бал җыйдым, шулай да кулдашым (напарнигым) Радик Гыйльфанов белән сынатмадык, - ди Нәзлия.

Трактор йөртүче хатын-кызлар да арткан: алдагы елларда спорт уеннарында гадәттә өч-дүрт кенә булса, быел алар уналтау булган.

Нәзлия гел яңалыкка омтыла. Йөк машинасына да утырып караган ул. Концертларда катнашырга, җырларга биергә дә вакыт таба. Әле кияүдә түгел. Буш вакытында йөгерә, өстәл теннисы уйный. "Бер генә белмәгән спорт төрем бар - ул да булса йөзү", - ди.