Татарстанда кисәтү: тояклы хайваннарны кертү вакытлыча тыелды — сәбәп нидә?

Махсус карар игълан ителгәнгә кадәр, пар тояклы терлекләрне республика территориясенә кертүне тыю турында күрсәтмә бирде.

Татарстан авыл хуҗалыгы һәм азык-төлек министрының беренче урынбасары Ленар Гарипов йогышлы, шул исәптән аеруча куркыныч терлек авыруларының Татарстан территориясенә үтеп керүен һәм таралуын булдырмау буенча республика штабы утырышында билгеләп узганча, “илдә терлекләрнең йогышлы авырулары буенча вазгыять шактый начар”. Шул уңайдан ул авыл хуҗалыгы предприятиеләре җитәкчеләренә һәм шәхси ярдәмче хуҗалыкларга терлекләрне тоту буенча ветеринария-санитария нормаларын төгәл сакларга, ябык режим, биологик яклау булдырырга, транспорт чараларын дезинфекцияләргә һәм санитария үткәрү пунктларының эшен оештырырга кушты. Шулай ук терлекчелек комплексларына йөрүче барлык затларны да контрольдә тотарга өндәде.

– Муниципаль берәмлекләр башлыкларына терлекчелек объектларыннан кимендә биш чакрым ераклыктагы терлекләрне вакытлыча тоту өчен урын оештырырга кирәк, – дип басым ясады беренче урынбасар.

Татарстан Министрлар Кабинетының Баш ветеринария идарәсе башлыгы Тимур Галиев илдә эпизоотик вазгыять һәм хайваннарның аеруча куркыныч һәм йогышлы авыруларын кертү һәм таратуны булдырмау чаралары турында сөйләде. Мондый авырулар республика икътисады өчен зур куркыныч тудыра, чөнки предприятиеләр һәм хуҗалыкларга җитди матди зыян салына.

Ленар Гарипов барлык пар тояклы терлекләрне республика территориясенә кертүне махсус күрсәтмәгә кадәр вакытлыча тыюны билгеләргә кушты, бу таләп нәселле терлекләргә кагылмый. Ул шулай ук авыл хуҗалыгы оешмалары җитәкчеләренә халыкны алты айга кадәр үгезләр белән тәэмин итү чараларын күрергә чакырды.

Ветеринария белгечләре, Корбан гаете алдыннан, читтән чирләр кермәсен өчен шулай ук саклык чараларын күрергә чакыра. Алар кисәтүенчә, бәйрәм чорында читтән корбанлык сарыкларны ветернария белешмәләреннән башка кертү аркасында, терлекләр өчен дә, кешеләр өчен дә куркыныч чирләр таралырга мөмкин. “Инфекцияләр кертүне булдырмау максатында, үзебезнең республикада үстерелгән сарыкларны сатып алырга чакырабыз”, – дип белдерде Татарстан Министрлар Кабинетының Баш ветеринария идарәсе башлыгы урынбасары Габделхак Мотыйгуллин журналистлар белән очрашуда.