#Авыл 10 август 2022, 10:28

Татарстанның бер районында 5 000 баш дуңгызны юк итәчәкләр

10 август 2022, 10:28

Шушы көннәрдә Спас районының Приволжский бистәсендә африка дуңгыз чумасы чыганагы табылуы турында хәбәр иткән идек инде. Бу афәт Югары Ослан районында да теркәлгән. Татарстан Министрлар Кабинетының баш ветеринария идарәсе мтабугат үзәге хәбәр иткәнчә, Сергей Пашковның крестьян-фермер хуҗалыгы территориясендә үлгән өч баш дуңгызның материал пробаларында шул авыру ачыкланган.

Скопировать ссылку

Татарстанның бер районында 5 000 баш дуңгызны юк итәчәкләр

Шуңа бәйле рәвештә, Баш ветеринария идарәсе, республикада дуңгызларның Африка чумасы буенча эпизоотик вазгыять уңай түгел, дип кисәтә.

Аны йоктыру сәбәпләре һәм чыганагы турында әлегә берни билгеле түгел. Спас районындагы хәл буенча да яңалыклар юк. Моның белән тикшерү комитеты шөгыльләнә.

Югары Ослан районы газетасы язганча, аучылар һәм җирле халык әйтүенчә, урманнарда берничә тапкыр үлгән кыргый кабаннар күренгән, дип сөйләшүләр инде ике атнадан артык бара. Пашков фермасында дуңгызларның баш саны 5000 башка җиткән булган, әмма алар тулысынча юкка чыгарылырга тиеш.
Карантин йоктыру учагыннан 5 чакрым радиуста кертелә. Бу зонага Федяево, Кильдеево, Харино, Коргуза, Уланово, Русское Макулово торак пунктлары керә.