Төз һәм яшь булуның сере – намаз

Аннары авыл үзешчәннәре Туфан Миңнуллинның «Аерылабыз, хуш инде» спектаклен куйды. Шуннан соң бәйрәм концертын тәкъдим иттеләр.

Актив, җитез катнашучыларның берсе – Дания апа аеруча үзенә җәлеп итте. Ул мәдәният йорты каршында эшләп килүче “Китмик әле яшьлек иленнән” дип аталган ансамбльдә шөгыльләнә икән. Җырлыйлар да, бииләр дә биредә, төрле уен коралларында да уйныйлар.

Күгәй авылында матур бер традиция бар. “Ел хатын-кызын” билгелиләр. Быел бу исемгә нәкъ менә Дания апа Кәримова лаек булды.

Әңгәмәдәшем 33 ел кибетче булып эшләгән. Яшь чагыннан бирле бии, лаеклы ялга чыккач, бу шөгыльгә тагын да күбрәк вакыты барлыкка килгән. Бүген Дания апага 74 яшь. Күз тимәсен үзенә, үкчәле түфлиләренә, төз гәүдәсенә сокланмый мөмкин түгел.

– Яшь, төз калуның сере – намазда, – ди Дания апа үзе. – Биш тапкыр намаз укыганда ничә тапкыр иелеп, бөгеләбез, торабыз, сәҗдәгә китәбез, бу – хәрәкәт. Көненә ике тапкыр урамда җәяү йөреп керәбез, гимнастика түгәрәгендә шөгыльләнәм, репетицияләргә җыелабыз, китапханәгә барабыз. Яшьләр янында үзең дә яшәреп китәсең. Кыскасы, сәламәт, яшь булып калу өчен актив булырга, намаз укырга һәм күңел тынычлыгы тоеп яшәргә кирәк, – дип киңәшләрен бирде Дания апа.