Җәннәттә балаларың белән күрешеп булачакмы?

–    Мәчет бакчасыннан чәчәк алырга ярыймы икән?
–    Мәчет һәм аның территориясендәге бөтен нәрсә вакф милке санала. Анда булган әйберләр мәчетнеке. Әгәр дә вакфка керем китерсен өчен чәчәкне саталар икән, аны сатып алырга ярый. 

–    Җәннәттә балаларың белән күрешеп булачакмы?
–    Әлбәттә, әмма аның өчен үзеңә җәннәт әһеле булырга кирәк. 

–    Коръән китабы өстендә тәсбих яки башка әйбер торса ярыймы?
Изге китап өстенә нәрсә дә булса кую әдәпсезлек билгесе булып тора, чөнки ул Аллаһ сүзләре һәм алар зур хөрмәткә ия.  

–    Коръән укып савабын вафат булган кешеләр рухына багышлау имештер дөрес түгел. Аларның гамәл дәфтәрләре инде язылган диләр. Ачыклык кертмәссезме икән?
–    Бу ялгыш фикер. Аллаһы Тәгалә Коръәни-Кәримнең “Хәшр” сүрәсе, 10нчы аятендә: “Сәхәбәләрдән соң килүче кешеләр: “И Раббыбыз, безне дә, бездән алдан иман китерүчеләрне дә ярлыка һәм иман китергән кешеләргә карата күңелләребезгә ачу салма. И, Раббыбыз, һичшиксез, син Аяучан, Рәхимлесең! Шул сәбәпле догаларыбызны кабул ит, дога кылалар”, – ди. Дога кылу ул игелекле гамәл. Коръән укып, аның хакына мәетләрнең рухын гафу ит, дип дога кылу шушы Китапның үзендә язылган булып чыга. Балаларның мәрхүм булган әти-әниләр өчен дога кылуы турында башка аятьләрдә дә язылган.   

–    Йөкле ханымга нинди догалар укырга кирәк?
–    Коръәнне укырга киңәш итәбез. Гарәпчә укый алмый икән, Аллаһы Тәгалә өчен иң кирәкле булган дога ул үз сүзләрең белән күңел түреннән чыгып әйтелгән дога.  

–    Төрле ташлардан, әйтик, гәрәбәдән ясалган муенсаны сәламәтлеккә файдасы бар дип тагу дөресме? Дингә каршы килмиме?
–    Традицион медицина аларның файдасын шаһитлык кыла икән, бу очракта кулланырга була. Әмма шунысын онытмыйк – шифа ул Аллаһы Тәгаләдән. Ниятегез дә дөрес булсын, таш булыша дип, Аллаһка ширек кылмагыз. Шул ук вакытта даруын да эчәргә, табиб кушкан башка дәвалану чараларын да кулланырга кирәк.   

–    Ипи, бала, әти-әни белән ант итәргә ярыймы?
–    Динебездә ул тыелган, бу – зур гөнаһ. Мөселман кешесе Аллаһы Тәгаләнең исемнәре белән генә ант итәргә тиеш: алар – валлахи, билләһи, таллахи.

–    Биргән сүзеңдә тора алмасаң нишләргә?
–    Сүзеңдә һичшиксез торырга кирәк. Аллаһы Тәгалә: “Икейөзлелекнең өч сыйфаты бар: ялган сүз сөйли, биргән сүзендә һәм вәгъдәсендә тормый, әманәткә хыянәт итә”, ди. Биргән сүзеңдә тора алмасаң, ул кешедән гафу үтенеп, кисәтергә тиешсең. Сүзеңне үти алуыңа баштан ук шикләнәсең икән, гомумән вәгъдә бирергә кирәк түгел. 

–    Исламда тыелган һөнәрләр бармы?
–    Диндә тыелган гамәлләргә китерә торган бөтен һөнәрләр дә тыела. 

–    Әтәчләр фәрештәләрне күргәч кычкыралар ди. Дөрес сүзме бу?
–    Пәйгамбәребез салләллаһу галәйһи вә сәлләм үзенең хәдисендә, әтәчләр фәрештәләрне күргәч кычкыралар, дип хәбәр иткән.

–    Киселгән тырнак һәм чәчләрне кая куярга?
–    Күмеп куярга кирәк. Аллаһы Тәгалә безне балчыктан яралткан. Без җирдән чыктык, шунда кайтабыз да. Тырнак белән чәч кенә түгел, тешләрне дә җиргә күмү хәерле. 

–    Иманлы җеннәр алар нинди була?
–    Кешеләрнең иманлысы һәм имансызы булган кебек, җеннәр арасында да бар шундыйлар. Аллаһы Тәгалә, мин кешеләрне һәм җеннәрне фәкать Үземә гыйбадәт кылсыннар өчен яралттым, ди. Ягъни кешеләр сыналган кебек, алар да сынала. Иманлы кешеләр нинди, иманлы җеннәр дә шундый.

–    Мөселман кешесенә кальян тартырга ярыймы?
–    Юк, ярамый. Ул – гөнаһ.