Аллаһы Тәгалә кешегә үзенең дә, башканың гомеренә зарар салуны тыя. Соңгы елларда террорчыларда тәненә шартлаткычлар бәйләп, «шәһит каешы» тагып кешеләр җыелган урыннарга кереп, үзен һәм башкаларны шартлатулар «модага» керде. Үз-үзеңә кул салу диндә һәрвакыт иң зур гөнаһларның берсе булды. Пәйгамбәребез: «Кем үз-үзен таудан сикереп үтерде, аны җәһәннәмдә өстән атачаклар, ул анда мәңге калачак. Кем үзен агу эчеп үтерсә, аны җәһәннәмдә агу эчертеп газаплаячаклар, ул анда мәңге калачак. Кем үзен тимер белән кадап үтерсә, аны кулына шул тимерне тоттырып мәңгегә җәһәннәмгә кертәчәкләр, ул тимерне үз тәненә кадап газаплаячак», - диде (Бохари һәм Мөслим риваятьләре). Үзен һәм башкаларны үтерүче ничек шәһит булсын да, ничек җәннәтләргә керсен?
Аллаһының дине безне кешелекле булырга, тирә-юньгә карата мәрхәмәтлелек кылырга чакыра. Пәйгамбәребез: «Кемнең йөрәгенә Аллаһ кешеләргә карата мәрхәмәтлелек салмаса, ул югалтуда һәм хәсрәттә булыр», - диде. Хәдистәге: «югалту» сүзен галимнәребез: «бар хәерлелектән һәм Аллаһының рәхмәтеннән мәхрүм калу», - дип аңлаттылар.
Сөекле Пәйгамбәребез күпчелек вакытта мөселман өммәте белән аралашкан һәм мөселманнар арасында булган кимчелекләрне төзәтү өстендә эшләсә дә, аның мөселман булмаган кешеләрнең хакларына кагылган әмерләре, катгый кисәтүләре дә бик күп. Әгәр мөселман башка дин кешесе яки бөтенләй дингә ышанмаучы белән имин тормыш итәргә килешсә, аңа ул килешүне бозу, аның малына, гомеренә зарар салу шәригатьтә катгый рәвештә тыела. Бер төркем террорчылар Париж урамнарында «Аллаһу әкбәр» сүзләрен кычкырып, кешеләрне атып йөрделәр, аларга кул чабучылар: «мөселманнарны түгел ич», - диделәр. Валлаһи, бу әлеге гулюу афәтенең бер мисалы, шайтан вәсвәсәсе һәм зур адашу. Бүгенге көндә Америкада, Аурупа илләрендә, безнең илдә ничә милләт, ничә дин кешеләре бер дәүләт эчендә үзәра килешеп яшиләр. Кемнең генә хакы кимсетелсә дә, аның хакларын яклауны дәүләт үз өстенә ала. Кайсы гына мөселман шушы килешүне бозып, башка дин кешеләренең хакларына керсә, кыямәттә Пәйгамбәр аңа каршы чыгачак. Пәйгамбәребез: «Кем үзәра килешү төзеп яшәгән кешегә золымлык кыла, яки аның хакын кимсетә, яки аннан тиешеннән артыгын таләп итә, яки аның ризалыгыннан башка нәрсәсендер ала, кыямәттә мин аңа каршы дәлил китерүче булачакмын», - диде (Әбү Даут риваяте).
Пәйгамбәребез вакытында килешеп яшәгән халыкларның хакларын яклау дәүләт вазифасы булды. «Кем килешү төзеп, Аллаһының һәм Аның илчесенең саклавы астында булган кешене үтерә, ул җәннәтнең исен дә сизмәс. Ә җәннәтнең исе 70 еллык юл ераклыгыннан сизелеп торыр», - диде.
Күп бәланең төп сәбәбе булып кешеләрнең дин гыйлеменнән надан булулары, гыйлем алмаулары, галимнәрдән ерак торулары килә. Үзен «ДАИШ» дип атаган - иблис гаскәренә ислам өммәтенең кайсы галимнәре кушылды, кемнәр аңа бәягать бирде? Мөселман авылларын таларга, аларга каршы чыккан мөселман ирләрен сарык суйган кебек башларын кисеп, шул башларны тотып селфига төшеп, шуны интернетка куярга кем аларга фәтва бирде? Аллаһ аларны һәлак итсен, чөнки бөтен ислам галимнәре аларга каршы чыктылар, алар исә ул галимнәрне «патшалар хезмәтчеләре», хөкүмәт ялчылары» дип көферлеккә чыгардылар.
Газиз кардәшләрем, аң булыгыз: әгәр нахакка Аллаһының бер генә мәхлугына золымлык кылсак та, кыямәттә ул мәхлукның хуҗасы каршына басып җавап тотачакбыз. Хәдистә килгәнчә, песине өендә бикләп ашатмый үтергәне өчен, бер хатын кыз җәһәннәмгә керә. Тагын бер хәдистә чыпчыкка зарар китергәнең өчен дә җавап тотасы әйтелә.
Золымлыктан, явызлыктан ерак булыйк, сөекле Пәйгамбәребез кебек кешеләргә дә, хайваннарга да, үсемлекләргә дә рәхимле булыйк. Аллаһы Тәгалә: «Без сине бар галәмнәргә рәхмәт итеп кенә җибәрдек», - диде («Пәйгамбәрләр», 107нче аять).
Кызыклы яңалыкларны күзәтеп бару өчен безнең МАХ каналына кушылыгыз.
Комментарийлар