Гөлназ Гафурова: «Рәхәт, бәхетле чакларда да Аллаһны онытмыйк, Аңа мөрәҗәгать итик»

Ифтарның төп максаты – үсеп килүче буынга Ислам диненең асылын аңлату, балаларга иман нигезләрен өйрәтү.
Кичәнең программасы бик бай һәм эчтәлекле булды: кунаклар өчен мөнәҗәтләр, җырлар яңгырады, дини уеннар оештырылды, сәхнәләштерелгән күренешләр аша дин нигезләре аңлатылды.

Казан балалар филармониясе ансамбле житәкчесе, продюсеры Гөлназ Гафурова балалар белән эшләү үзенчәлекләре, бу чараның әһәмияте турында сөйләде: 
— Балалар – чиста, саф күңелле, аларның ниятләре изге. Безнең мөнәҗәтләребез бик күп, Россиядә бердәнбер мөнәҗәтчеләр ансамбле буларак, безне төрле чараларга да чакыралар. Җырларга килгәндә, нәниләрдән “Нинди җыр башкарабыз?” дип сорасам, алар гел мөнәҗәт көйлик әле, диләр. 

Быелгы ифтар аеруча киң колачлы булуы белән аерылып торды. Бирегә Казанннан гына түгел, Лаеш, Арча районнынан да килүче кунаклар бар иде. Гөлназ ханым билгеләп үткәнчә, бу чара һәркем өчен ачык. 
— Кешенең гомерендә авыр мизгелләр дә булгалый, шул чакларда Аллаһы Тәгаләне искә төшерәбез. Рәхәт, бәхетле чакларда да Аллаһны онытмыйк, Аңа мөрәҗәгать итик, догалар кылыйк. Гаиләләребез бердәм булсыннар! – дип теләде ул. 

Кичәгә дәрәҗәле кунаклар да чакырылган иде. Татарстанның атказанган артисты Рөстәм Асаев оештыручыларга, әти-әниләргә рәхмәтен җиткереп, изге теләкләрен юллады:
— Балаларда Аллаһка мәхәббәт уятканыгыз өчен зур рәхмәт. Бәхетле, иманлы, догалы булыйк. Иң мөһиме – ихласлык, йөрәгебез чиста булсын. Һәммәбезне изге Рамазан ае белән котлыйм, хөрмәтле мөселман кардәшләре! 

Ифтарның иң дулкыналндыргыч мизгеле, әлбәттә, балаларның чыгышлары. Чараның кечкенә йолдызычыгы Мәдинә Сәгъдиева үзенең хис-кичерешләре белән уртаклашты:
— Без бу чарага бик озак әзерләндек. Бүген инде матур итеп, тырышып чыгышлар ясыйбыз. Гомумән, бу изге айны көтеп алдым. Әле үзем дә ике көн ураза тотып карадым. 

Татарстанның халык артисты Айгөл Бариева бу чараның тәрбияви ягына зур бәя бирде. Аның фикеренчә, мондый мохиттә үскән балаларның киләчәге якты булачак:
— Килеп керүгә үк барыгызга да сокланып карадым. Шундый мохиттә үскән балалар берничек тә начар кеше булып үсә алмый, алар гел Аллаһның рәхмәте белән булачаклар. Сез зур эш башкарасыз. Балаларны шулай тәрбияләү  – ул иң дөрес юл! – диде ул. 

Айгөл ханым “Әниләр догасы” укыды, мөнәҗәтләр башкарды, шулай ук үзенең өр яңа “Риза бул барына” дигән җырын тәкъдим итте. 

Әти-әниләргә, балаларга бүләкләр тапшырылды. Кичә бик җылы һәм ихлас узды, кунакларның рәхмәт сүзләре, сокланулары моны дәлилли. Балаларның диннең матурлыгын күреп үсүе киләчәккә зур өмет уята. Иң мөһиме – күңелләрдәге бу иман нуры беркайчан сүнмәсен! Мондый күркәм очрашулар дәвамлы булсын иде!

Залинә Гыйлаҗиева