“Изге Болгар җыены”: тәүбә кылу чарасы, ярминкә, милли көрәш...

Билгеле булганча, “Изге Болгар җыены” Болгарда 1989 елдан бирле үткәрелә. “Коммунизм һәм атеизм чорында да безнең халкыбыз, күмәкләшеп булмаса да, Болгар шәһәренә барып, Кара пулат, Кече манара, “Хан мәчете” нигезенә җыелышканнар. Хаҗга бара алмаганда да, изгеләр җирләнгән җир дип, зиярәт кылу нияте белән дә анда баралар иде. Шушы изге урын динебезне саклап калуга да сәбәпче булды”, – дип билгеләп үтте Татарстан мөфтие урынбасары Илфар хәзрәт Хәсәнов.

Гадәттәгечә, җыенда Россия баш мөфтие, Россия мөселманнары үзәк диния нәзарәте рәисе Тәлгать хәзрәт Таҗетдин белән Татарстан мөфтие Камил хәзрәт Сәмигуллин катнашында җәмәгать белән тәүбә кылу чарасы торачак. “Тәүбә” чарасы Болгар шәһәрчегендәге Кече манара янында якынча 9:30 сәгатьтә башлана.

“Изге Болгар” җыенының кульминацион өлеше 12:00 сәгатьтә Болгарның тарихи “Хан мәчете” урнашкан урында җәмәгать белән намаз уку булачак. Намаздан соң дин кардәшләребез динебез һәм Ватаныбыз хакына шәһит киткән бабаларыбыз һәм халкыбызның батырлары рухына, шулай ук мөселман өммәте һәм илебез иминлеген сорап догалар кылачак.

9:00дән 12:00гә кадәр тарихи “Хан мәчете” территориясендә интерактив тематик мәйданчыклар эшләячәк: биредә ислам тарихы темасына вәгазьләр һәм лекцияләр укылачак. Яулык, чалма бәйләү буенча мастер-класслар һәм намаз дәресләре үткәрү дә ниятләнә.

Чара кысаларында шулай ук Истәлек билгесе янындагы төп сәхнәдә мәдәни программа да каралган. "Болгар дәүләт тарих-архитектура музей-тыюлыгы" директоры Рамил Җиһаншин хәбәр иткәнчә,  җыен кысаларында Болгар дәүләт тарих-архитектура музей-тыюлыгы территориясендә күргәзмәләр эшләячәк. Традициягә кергәнчә, җыенда милли көрәш тә булачак. Баш батырга нинди бүләк биреләчәген спикер сер булып калсын диде.

“Изге Болгар җыены”нда шулай ук «Абыстайлар хәзинәсе» дип исемләнгән хәләл ярминкә эшләячәк. Татарстаннан, Мари Эл, Чувашия һәм Мордовиядән барлыгы кырык җитештерүче үз товарларын тәкъдим итәчәк.

 Бөтендөнья татар конгрессы Башкарма комитеты җитәкчесе Данис Шакиров билгеләп узганча, җыен алдыннан “Мили тормыш һәм дин” татар дин әһелләре форумы үтәчәк. Чарада 79 төбәктән 1 мең делегат катнашыр дип көтелә.