Корбанлыкны үзебезнең сарык үрчетүчеләрдән алыгыз

– Бүгенге көндә сарык үрчетү белән шөгыльләнүче төбәкләрдә терлек авырулары күзәтелә. Тилчә (ящур) авыруы – ун, бруцеллез – утыз алты, оспа шулай ук ун төбәктә таралган. Алардан сарык кертү тыела. Әлеге чирләр терлекләр өчен генә түгел, кешеләр өчен дә куркыныч. Корбан гаете көннәрендә бу бигрәк тә актуаль, – дип кисәтте Татарстан Министрлар Кабинеты карамагындагы Баш ветеринария идарәсе җитәкчесе урынбасары Габделхак Мотыйгуллин. 

Ул шулай ук Татарстанда сарык үрчетүчеләрнең саны артуны билгеләп, республиканың үз халкын корбанлык сарык белән тәэмин итә алуын ассызыклады. 

– Терлекне үзебездән генә алырга киңәш итәбез. Бердән, инфекцияле авырулар таралуына юл куймыйбыз, икенчедән, үз сарык үрчетүчеләребезгә булышлык күрсәтәбез, – диде Габделхак Мотыйгуллин.

Читтән керткән очракта, терлекне авырулардан имин булган төбәкләрдән һәм фәкать Баш ветеринария идарәсе белән килештерелгән, шулай ук аларның ветеринария белешмәсе булырга тиеш. 

Корбанлык чалу өчен республикада илле биш, шул исәптән Казанда унҗиде рәсми мәйданчык эшләячәк.