Татарстан мөселманнары Диния нәзарәтенең дини бәяләмәсе белән, хәнәфи мәзһәбе нигезендә, ат итен ашарга рөхсәт ителә, бу гамәл кире кагылмый һәм гөнаһ түгел. Шунысын билгеләп үтү мөһим, хәләл булуы исбатланмый торып, теләсә кайсы хайванның, хәтта шәригать буенча ашарга яраклысын да кулланырга ярамый.
Ит хәләл саналсын өчен, кайбер шартларны үтәү зарур. Ул шартлар хайванның чалынган вакыттагы халәтен дә, чалу процессын да һәм аны алга таба эшкәртү, саклауны да үз эченә ала. Барыннан да элек, хайван — сәламәт, ә аңа карата мөгамәлә гуманлы булырга тиеш. Малны чалганда «Бисмилләһи, Аллаһу әкбәр» сүзләрен әйтергә («Аллаһ исеме белән, Аллаһ бөек»).
Чалуның да үз ысулы бар, аны үтәү мөһим. Шул ук вакытта чалучы мөселман, балигъ булырга тиеш.
Җитештерүнең һәр этабында чисталыкны саклау зарур. Продукт хәләл статусын сакласын өчен, аны тыелган (харам) матдәләр яки продуктлар янында тотмаска кирәк.
Бу таләпләрнең дөрестән дә үтәлүенә ничек ышанырга? Моның өчен сертификацияләүче орган ягыннан даими контроль кирәк. Татарстан мөселманнары Диния нәзарәтенең «Хәләл» стандартлары комитеты нәкъ менә шушы эшне башкара: белгечләр билгеләнгән таләпләрнең үтәлешен тикшереп тора һәм продукциянең хәләл стандартларына туры килүен раслый.
Дилбәр Гарифуллина
Комментарийлар