Тукай һәйкәле Россиянең тагын бер шәһәрендә пәйда булды: аны Татарстан бүләк иткән

Түбән Новгород өлкәсенең Сергач шәһәрендә Тукай бюсты ачылды. Аны төбәккә Татарстан Рәисе Рөстәм Миңнеханов бүләк иткән.

Тантаналы чарада Татарстан Республикасы вице-премьеры, Бөтендөнья татар конгрессының Милли советы рәисе Васил Шәйхразиев һәм Түбән Новгород өлкәсе Хөкүмәте рәисе урынбасары Екатерина Солнцева катнашты.

Яңа мемориаль комплекс шагыйрь бюстын, истәлекле стеланы һәм төзекләндерелгән территорияне үз эченә ала. Проект Түбән Новгород өлкәсе татарларының төбәк милли-мәдәни автономиясе һәм Сергач округы татарларының җирле автономиясе инициативасы белән тормышка ашырылган.

Бюст авторы - Татарстанның атказанган сәнгать эшлеклесе Винера Абдуллина, архитектура проектын Никита Тимонин эшләгән. Тантанадан соң кунаклар һәйкәлгә чәчәкләр салган.

Васил Шәйхразиев билгеләп үткәнчә, Габдулла Тукайга һәйкәлләр татарлар яшәгән төрле шәһәрләрдә ачыла. Әйтик, быел июль аенда Омск өлкәсенең Ашеван татар авылында да шагыйрьгә һәйкәл куелган. Шул ук айда Казахстанның Петропавловск шәһәрендә Тукай бюсты урнаштырылган.

Әлеге вакыйга татар халкының мәдәни мирасын саклау һәм бөек шагыйрьнең исемен киләчәк буыннарга җиткерү юлында тагын бер мөһим адым булды.

Исегезгә төшерәбез, Россия Президенты Владимир Путин Габдулла Тукайның тууына 150 ел тулуны бәйрәм итү турындагы указга кул куйды.