Республика ифтарына 16дан алып 70 яшькәчә волонтерлар кирәк

Татарстан Диния нәзарәте әлеге зур чарага әзерлек эшләрен башлап та җибәргән. Нәзарәтнең яшьләр бүлеге дә әлеге эшнең үзәгендә тора. Ифтар ашына алар волонтерлар җәлеп итү белән шөгыльләнә. Бүлек җитәкчесе Айгөл Биктимерова сүзләренчә, узган елны биш мең кеше катнашында узган ифтарда 230 волонтер хезмәт куйган. Быелгысына исә 700 волонтер туплау бурычы тора.

- Мәҗлескә килүчеләрне каршы алырга, аларны өстәл артына утыртырга, табын әзерләргә, халык таралганнан соң өстәлләрне җыештырырга шактый кеше кирәк була. Бүгенге көнгә 370 кеше бу эштә катнашырга теләк белдерде, без аларның исем-фамилияләрен, паспорт мәгълүматларын теркәп куйдык. Ни өчен дигәндә, үзегез беләсез, стадион бик зур, ифтарда күп кеше катнашачак. Куркынычсызлык кагыйдәләрен истә тотып, без волонтерлар турындагы шәхси мәгълүматларны үзебезгә теркәп барабыз. Волонтер булырга теләүчеләр арасында хатын-кызлар аеруча күп, - дип сөйләде безгә Айгөл Биктимерова.

Ярдәмчеләрнең яшенә килгәндә, 16дан алып 70 яшькәчәләрне чакыралар.
- 14 яшьлекләрне дә алмыйсызмы дип еш мөрәҗәгать итәләр. Эшнең авырлыгын истә тотып, без фәкать 16 яшьтән генә алабыз. Әти-әнисенә, абый-апасына ияреп килсә, искәрмә ясарга әзербез. Узган елны андый тәҗрибәбез булды. Үткән елгы ифтар ашында хезмәт куйган волонтерлар үзләре безгә шалтыратып, һичшиксез киләчәкләрен әйттеләр. Республика районнарыннан килүчеләр дә күп булган иде. Быел да авыл мәхәлләләре аларны алып килергә булды, - ди нәзарәтнең яшьләр бүлеге җитәкчесе.

Волонтер буласы килеп, көндез эшеннән китә алмаучылар стадионга кичке алтыда да килә ала. Тик моның турында алдан хәбәр биреп куярга тиешләр.
Уразада булмаган ярдәмчеләрне көндез ашату каралган, чөнки алар иртәдән алып төн уртасына кадәр эшләячәк. Ифтар соң беткәнгә, өстәлләрне җыештыру күп вакыт алганга, волонтерларны шәһәрнең берничә урынына автобуслар белән таратачаклар.

Ифтар ашына волонтер булырга теләүчеләр 89274533000 яки 264-64-19 телефонына шалтырата ала. Вконтактедагы "Республиканский Ифтар 2016 (Волонтеры)» төркеменә теркәлеп, хәбәр калдырырга була. #iftarrt2016 #Рамазан2016 #ДУМРТ #Ислам #мусульмане #волонтеры хэштегы белән таба аласыз.