Республикакүләм ифтарда 8 меңләп кеше катнашты

Чара Татарстан мөселманнары диния нәзарәте, “Ак Барс Арена” стадионы дирекциясе, «Туган авылым» комплексы һәм “Казан Экспо” күргәзмәләр үзәге көче белән оештырылды. Россиядәге иң зур авыз ачу мәҗлесендә 8 мең кеше катнашты. 
Татарстан мөфтие Камил хәзрәт Сәмигуллин билгеләп узганча, ифтар ул очрашу, аралашу чарасы. "Кайбер дин кардәшләребез белән без шушында гына очрашабыз", - диде ул. Быелгы ифтарга нәтиҗәләр чыгарып, киләсе елга яңа планнар кора башларга җыенуларын да хәбәр итте. "Киләсе елга республикакүләм ифтарны 15 нче тапкыр уздырачакбыз. Юбилей дата булачак. Идеяләребез бик күп. Программасына бәлки яңалыклар кертелер, бәлки призлар уйнатылыр. ИншәАллаһ, киләсе елга күрерсез", - диде ул.
Быел "Казан Экспо" фойесында «Абыстайлар хәзинәсе» дип исемләнгән милли сәүдә күргәзмәсе дә эшләде. Татарстанның төрле почмакларыннан кул осталары үзләренең милли күн, текстиль, мех, мамыктан кул эшләнмәләрен һәм башка кием-салымны, бизәнү әйберләрен тәкъдим итте. 
Ифтар программасының махсус кунагы буларак, Дагыстан Республикасыннан ислам нәшидләрен башкаручы “Нәшидүл ислам” төркеме җырчылары чыгыш ясады. Хәзрәтләр тирән эчтәлекле вәгазьләрен сөйләде. 
«Туган авылым» милли-туристлык комплексы хуҗаларының берсе Радик Абдрахманов әйтүенчә, оештыручылар ел да ифтар тагын да яхшырак узсын дип тырыша. "Быел өстәлләргә табигый продуктлардан ясалган хәләл колалар да куелды. Киләсе елга тагын нәрсә дә булса өстәрбез дип уйлап торабыз. Быел да пылау урынына итле карабодай бирелде. Узган ел аны бик ошаттылар. Һәм без кабатларга булдык. Рецептын туклану департаменты технологлары белән эшләдек. Ә киләсе елга азу яки башка ризык булыр", - диде ул.
«Ак Барс Арена» стадионы генераль директоры Радик Миннәхмәтов оештыру мәсьәләсендә узган елларның кимчелекләрен исәпкә алып эшләүләрен ассызыклады. Журналистларның ифтар кайчан стадионда оештырыла башлаячак дигән соравына, рамазан ае җәй айларына күчкәч кенә мөмкин булуын истә тотып, "аңа кадәр 20 еллап вакыт бар әле. Сезне анда чакырабыз», – дип шаяртты.