Телебез саклансын өчен динебезне сакларга кирәк

– Милләт булып сакланып калу өчен, телебез югалмасын өчен динебезне сакларга кирәк. Аллаһы Тәгалә Коръәннең “Әр-Рум” сүрәсендә: “Җир һәм күкләрнең төзелеше һәм телләрегез, төсләрегез төрлечә булуы Аллаһының галәмәтләреннәндер, әлбәттә, Аллаһының бу эшләрендә белем ияләре өчен дәлилләр бардыр”, – диелә. Телләрнең төрле булуы Раббыбызның дәлилләреннән булгач, димәк, телне саклау Аллаһының дәлилләрен саклау булып тора. Шуның өчен дә ана телебезне саклау – һәрберебезнең бурычы, – ди ул.

Милләтне күтәрү өчен Җәлил хәзрәт татарча яшәүне нигез итеп алган яшь гаиләләр турында күбрәк сөйләргә, күрсәтергә, язарга кирәк дип саный.
– Телевидениедә татарлар турында матур тапшырулар күрсәтелә. Төрле төбәкләрдә яшәүче татарларны, күп очракта, җырчы, биюче әбиләрне, гармунчы бабайларны, мәчеттә утыручы өч-дүрт картны күрсәтәләр. Алар урынына кем кала? Оныклары нинди телдә сөйләшә, нинди телдә уйлый, кемгә хезмәт итә? Без үлеп беткәч, безнең урынга нинди буын килер? Милләткә сәнгать, җыр-бию дип кенә карау дөрес түгел, – ди ул.

Милләтне саклап калуның тагын бер юлы – нәсел шәҗәрәсен белергә, балаларны, оныкларны нәселләре белән горурланырга өйрәтү. Нәселеңне белү өчен милләтеңнең тарихын белергә кирәк.
– Кайсы гына халыкның тамырларын тикшереп карасаң да, татар генын табарга була. Әмма алар үзенең милләтенә хезмәт итүчеләр түгел. Аларда татар каны бар дип сөенеп утыру ул кәгазь акча яндырып, кулны җылыту сыман. Бу хаталарны кабатламас өчен, туган телебездә фикерлик, татарча сөйләшик, үз телебездә сөйләшә торган балалар үстерик. Толерантлык та кирәк, әмма ул үз милләтеңнең мәнфәгатьләрен юкка чыгару хисабына булмасын. Нәселне саклау да – безнең бурыч, – ди Җәлил хәзрәт.