Балык Бистәсе районында янгын: «Бөтен авыл халкы кузгалды, үзебез шок хәлендә калдык...»

Бу вакытта хуҗабикә үзе өйдә булмый. Бәхеткә, ди аның улы Фәрит. 

– Туган йортыбыз, нигезебез ул, – дип сүзен башлады әңгәмәдәшем. –  Гаиләм белән Балык Бистәсе район үзәгендә яшим. Бирегә җаебыз булган саен кайтабыз. Әниебез Нәкыя биредә яши иде, әле шул көннәрдә генә авыртып торгач үзебезгә алып киткән идек. Аңа 77 яшь. Шул нигездән яшьли чыгып киттек. Әтиебез мәрхүм, аның арабыздан китеп баруына да 7 ел булды. Энем 35 яшендә урманда агач басудан һәлак булды. Тагын бер сеңлем бар, ул кияүдә, гаиләсе белән Балык Бистәсенең үзендә яши. 

Фаҗига буласы көнне Фәрит абый иртәнге сигез тирәсендә тормыш иптәше белән туган авылына хуҗалык эшләрен башкару өчен кайта. 

– Унбер тирәсендә әбәт ашап чыктым. Күршеләр койма тоталар иде бугай. Бер капчык бәрәңгене сортларга бүлү өчен җиргә салдым да шартлаган тавышка борылып карасам күршеләр гаражыннан төтен чыкты, шул вакытта ялкыны да бәрде. Шифер шартлады. Хатыным сарымсак утыртып йөри иде, аның янына барып: «Янабыз» дип кычкырдым. Безнең аралар бик якын, метр ярым гына. Күршеләрнең гаражы, иске мунчалары, безнең өй бер рәттә. Алардан ут чыгып 10 минут үткәндерме, ялкын телләре уйнаклап килеп, безнең хуҗалыкны да ялмап алды. Безнең өй такта белән генә тышланган. Шундый тиз булды ул. Түбәне куптармадык, шуңа янгын башка каралтыларга күчмәде. Документлар үзебез белән иде. Бөтен авыл халкы кузгалды, үзебез шок хәлендә калдык. Кая барып тотынырга да белмисең бит ул чакта. 

Ярдәмгә ашыккан һәркемгә рәхмәт. Авылыбызның янгын сүндерүчесе Рифат Ихсанов бернәрсәгә карамыйча эчкә дә керде. Аның курку белмичә янгын эченә кереп диярлек утны сүндерүенә, җиһазлар алып чыгуына карап шаккаттык. Ул булмаса эшләр харап иде. Тегермәнлек авылында да ут сүндерү машинасы бар иде, ул килеп җитте. Газ, электр энергиясен тиз арада сүндерделәр, - ди Фәрит абый. 

Район үзәгеннән янгын сүндерүчеләре килеп җиткәнче авыл кешеләре ярдәме белән ут сүндерелгән дә. Җиһазларның барысын да чыгарып бетергәннәр. Өйнең түшәмнәре калган була әле. Тик менә иртәнге дүрттә пыскып торган урыннан тагын ут чыккан. Тәрәзә аслары янып беткән. 

– Әнигә бу хакта җайлап кына әйттек, тик үзен нигезенә алып кайтмадык, бездә кыш чыгачак. Быелга берни эшләп булмый, язын әкренләп эш башларга ниятлибез. Кечкенә генә өй төзергә исәп бар. Безнең мунча да шунда, һәр ял саен рәхәтләнеп юынып китә идек. 25 сутый бакчабыз бар. Җәй буе җиләк-җимеш, кош-корт үстереп мәш килдек. Күрәчәк, беркемне дә гаепләп булмый, уен эше түгел бит ул, махсус эшләнмәгән. Шул ук көнне полиция, янгын сагы хезмәтеннән дознаватель килде, сорау алдылар. Утны күршеләр гаражындагы электр чыбыгыннан чыкты дип әйттеләр. Әле ярый төнлә булмаган дим, юкса, бөтен кеше йоклаган вакытта бернине дә саклап калып булмас иде, - ди Фәрит абый. 

Әлеге гаиләгә ярдәм кирәк. Булышырга теләүчеләр Фәрит Кәримуллин исемендәге Саклык банкы картасына акча күчерә ала. Карта 89872284471 номерына беркетелгән.