Ир-атларны күрә алмыйм!

Ирем белән аерылышканнан соң ярты ел узды. Соңыннан гына иремнең 5 ел буе хыянәт иткәне ачыкланды, аларның уртак балалары бар икән. Мин яшәргә тырышам: элекке хоббиларымны искә төшердем, спортзалга йөри башладым, ябыктым. Ләкин ир-атларны күрә дә алмыйм. Алар барысы да хыянәтче, ялганчы булып тоела.
Сүз уңаеннан, элеккеге ирем үзен тәртипле, намуслы кеше итеп күрсәтә иде. Мин моның шулай булуына 20 ел буе ышандым. Ул югары вазифа биләде, тирә-юньдәгеләр дә аны хөрмәт итә иде. Хәзер эчемдә чарасызлык, бушлык хисе. Кайчан җиңеләер икән? Киләчәктә мин беркем белән дә якыная алмам төсле. Ир-атларга тормышымда башка урын калмады. Бәлки, мәчеләр алырга вакыттыр?

Гөлнара С.

Бу очракта иң куркынычы – аның хыянәтче булуы түгел. Иң авыры – сез хәзер чынбарлыкны кабул итүегезгә ышанып бетмисез. Сез бу кеше белән 20 ел буе яшәгән, аны көн саен күргән. Ул югары вазифадагы, башкалар өчен әдәпле, ышанычлы кеше үрнәге. Һәм сезнең өчен дә ул нәкъ шундый булган. Хәзер исә аның еллар буе ике төрле тормыш алып баруы, икенче гаиләсе, баласы булуы ачыкланган. Сез исә моны сизмәгәнсез. Менә бу – чын җәрәхәт. Хыянәт үзе түгел, ә «Ничек мин шулкадәр вакыт берни дә күрмәгән? Димәк, мин кешеләрне аңламыйм? Димәк, үзем гаепле?», - дигән фикер газаплый.
Хәзер сез һәр ир-атка карыйсыз да: «Әгәр мин тагын алдансам? Әгәр ул да шулай ук матур итеп ялганлый белеп, мин моңа тагын ышансам?» – дип уйлыйсыз. Чынлыкта, сез ир-атларның хыянәтеннән түгел, үзегезнең яңадан ялгышуыгыздан, үз-үзегезгә ышанмавыгыздан куркасыз. Шуңа күрә ир-атларга ышанырга өйрәнү түгел, ә үз-үзегезгә ышанычны кире кайтару кирәк. Моның өчен вакыт һәм белгеч ярдәме таләп ителә.