Ана капиталы тагын да адреслырак була, диләр

Билгеле булганча, «Ана капиталы» программасының гамәлдә булу вакыты 2016 елда тәмамлана, ә киләчәк язмышы әлегә мәгълүм түгел. РФ Премьер-министры Дмитрий Медведев быел апрель аенда Новокузнецк металлургия комбинаты эшчеләре белән очрашу вакытында, ана капиталын түләү бәлки 2016 елдан соң да дәвам итәр, дигән фикер җиткергән иде. Шушы көннәрдә исә ахыргы карар чыгарылганчы, башта җәмәгатьчелек һәм экспертларның фикерен өйрәнергә кирәк, дип белдерде.
Ә февраль аенда Президент Владимир Путин, программа тәмамланганнан соң, төбәкләргә гаиләләргә алга таба ярдәм чараларын уйларга кушкан иде. Бераз соңрак ул 2016 елдан соң ана капиталын урта һәм түбән керемле гаиләләр өчен саклап калу ихтималын җиткерде. Хәзергә исә ана капиталын, икенче балалары тугач, керемнәре күләменә карамыйча, барлык гаиләләр дә алуга хокуклы. Россия күләмендә 2006 елда эшли башлаган бу программа илдә демографик вазгыятьне яхшырту өчен каралган иде. Бүгенге көндә ана капиталының күләме 408 мең сум тәшкил итә. 2013 ел бюджетында бу төр түләүләрне башкару өчен 200 млрд сум каралган.