#Икътисад 15 мая 2025, 16:16

Казан ислам дөньясы илләрен кулга-кул тотышып алга барырга әйди

15 мая 2025, 16:16

Татарстан башкаласында 13-18 май көннәрендә “Россия – Ислам дөньясы: KazanForum” XVIнчы халыкара икътисад форумы эшли.

Скопировать ссылку

Казан ислам дөньясы илләрен кулга-кул тотышып алга барырга әйди

“Казан Экспо” халыкара күргәзмәләр үзәгендә 15 майда форумны тантаналы ачу булды.

Мәскәүдә 14 майда Малайзия Премьер-министры Әнвәр Ибраһим белән очрашуы вакытында Россия Президенты Владимир Путин: ”Казандагы халыкара икътисад форумына зур әһәмият бирәбез”, – дип әйтеп үткән иде.

Казандагы быелгы форумга Татарстан мөфтие Камил хәзрәт Сәмигуллин Коръәннән өзек укып фатиха бирде.

– Форум ел саен үзенең нәтиҗәлелеген, дуслыкның ныгый баруын, хезмәттәшлекнең үсешен күрсәтә. Чараларның һәм илләрнең күплеге Россия белән ислам дәүләтләрен үзара хөрмәт берләштерүе турында сөйли. Бу безнең уңышлы киләчәкнең нигезе, – диде Россия вице-премьеры Марат Хөснуллин форумны ачу вакытында.

Форумда 103 илдән 10 мең вәкил катнаша. Татарстан Рәисе Рөстәм Миңнеханов форумда катнашучыларны җылы сәламләде.

– Үзенең эшчәнлеге елларында Казан форумы халыкара оешмаларның, дәүләт хакимияте органнарының, финанс оешмаларының, бизнесменнарның, шулай ук Россия һәм чит илләр компанияләре топ-менеджерларының файдалы мәйданчыгына әверелде, – диде Рөстәм Миңнеханов.

Россия вице-премьеры Марат Хөснуллин, Татарстан Рәисе Рөстәм Миңнеханов, Россия торак-коммуналь хуҗалык министры Ирек Фәйзуллин форум кысаларында оештырылган “Россия хәләл экспо”, төзелеш, техника күргәзмәләре белән танышты. “Казан Экспо”да 12 илдән килгән шеф-поварларның осталык бәйгесе дә бара.

Ислам финансы, мәдәният, медицина, мәгариф, ислам модасы, эшлекле хатын-кызлар хезмәттәшлеге, туристлык темаларына сессияләр һәм түгәрәк өстәлләр уза. “Татмедиа” матбугат һәм массакүләм коммуникацияләр буенча республика агентлыгы “Киләчәк медиасы бүген: контент һәм технологияләр” темасына медиасессия оештырды.

“Татмедиа” агентлыгы җитәкчесе Айдар Сәлимгәрәев чит илләрнең Татарстан белән кызыксынуы артуын әйтте.

– Төркиянең, Берләшкән Гарәп Әмирлекләренең, Мисырның, Малайзиянең, Индонезиянең әйдаман медиаоешмаларының җитәкчеләре безнең белән бүген. Бу безнең уртак тырышлыкның нәтиҗәсен раслый . Казан форумы – Россия белән Ислам дөньясы арасындагы күпер, – диде Айдар Сәлимгәрәев.

Казан форумы 2009 елдан бирле үткәрелә. Россия Президенты Владимир Путин күрсәтмәсе буенча Татарстан Рәисе Рөстәм Миңнеханов “Россия – Ислам дөньясы” стратегик караш төркемен җитәкли.

Кызыклы яңалыкларны күзәтеп бару өчен Вконтактега кушылыгыз.

‹ ›