Бакчаны шөпшәдән ничек сакларга?

Уңыштан колак какмаска, шул ук вакытта файдалы бөҗәкләр белән кошларга да зыян килмәсен өчен алардан ничек сакланырга соң? “АиФ”та басылган киңәшләр сезгә дә кызыклы булыр. 

Визуаль куркыткычлар. Әйтик, ботакларга иске CD-дисклар, фольга тасмалары элеп куярга була – аларның ялтыравыгы һәм җилдә тирбәлүе кошларны “адаштыра”. Ерткыч кош силуэтлары рәвешендәге һава еланнарының файдасы тиеп куя. Гадәти карачкылардан аермалы буларак, алар җилдә хәрәкәтләнгән кебек була, һәм кошлар моны үзләренә куркыныч итеп кабул итә.

Каплау материалы – шулай ук уңышлы вариант. Спанбонд яктылык һәм һава үткәрә, әмма кошлар өчен киртә булып тора. Биек булып үсми торган культуралар һәм куаклар өчен дугалар ярдәмендә спанбондтан “тоннель” ясарга да була. 

Чия урынына башка «сый-нигъмәт». Кошларның бакчага булган кызыксынуын киметү өчен, җимеш агачларыннан читтә алар өчен альтернатив «сый» оештырырга мөмкин: ашлык салынган җимлек куярга яки миләш яки кыргый чия утыртырга – кошлар аларга бик теләп күчә.
Кошлар өчен ванна. Бакча янында кошлар өчен коену урыны урнаштырыгыз. Кайвакыт кошлар җиләкләргә ашыйсы килгәннән генә түгел, сусаганда да һөҗүм итә. Суга кереп чыкканнан соң, игътибарлары читкә китәргә мөмкин.

Шөпшәләргә каршы: баллы калдыкларны җыештыру. Агач төпләрендә коелган җимешләр ятса, янәшәдә сок яки кайнатма салынган ачык савытлар торса, шөпшәләр бакчага ешрак килә. Баллы калдыкларны алып, җыештырып торыгыз. 

Пластик шешәдән ясалган капкыннар. Пластик шешәләрдән ясалган капкыннарның да нәтиҗәсе бар: шешәнең өске өлешен кисеп аласың, аны башы белән аска каратып кире утыртасың һәм җайланма әзер. Ул бүрәнкә рәвешендә килеп чыгарга тиеш. Эченә баллы су, су кушып сыегайтылган кайнатма, сироп саласың. Мондый капкыннарны агач башларына яки шөпшәләр актив булган урыннарга эләләр.

Куркыта торган исләр. Шөпшәләр кискен исләрне яратмый. Проблемалы урыннарга кипкән әрем, бөтнек яки лаванда бәйләмнәре куярга мөмкин.

Фото: нейрочелтәр