Бик-бик тәмле лимон пирогы рецепты

Ул бик җайлы, бик матур, тиз пешә һәм бәясе дә әллә ни кыйммәт чыкмый. Әгәр сез дә минем кебек лимонлы пирог яратсагыз, пешереп карагыз әле, бер дә үкенмәссез.

Моның өчен кирәк була: 1 чәй кашыгы коры чүпрә, 1 кап атланмай (маргарин да ярый), 1 йомырка, ярты стакан сөт, чама белән 3 стакан он, 1 чәй кашыгы тоз (маргаринга бассагыз, тоз салмагыз), 2 аш кашыгы шикәр комы.

 Эчлеге өчен: 1 зур лимон, 1 стакан шикәр комы.
👍Чүпрәне җылы сөткә салып, күпертеп алабыз. Аннары аңа тоз, шикәр, йомырка, бүлмәдә торып йомшарган атланмайны салып, камыр басабыз. Онның барысын да берьюлы кушмагыз, азлап-азлап кына, баса-баса гына салыгыз. Ул бик тыгыз булырга тиеш түгел, ләкин кулга да ябышмасын.

👍Камырны җылы урынга куеп, берәр сәгать күпертәбез.
👍Лимонны ярып, орлыкларын алабыз да иттарткычтан чыгарабыз. Шуңа 1 стакан шикәр комын кушып, эреп беткәнче туглыйбыз.
👍Күпереп менгән камырны 4 өлешкә бүләбез. Берсен – төбенә дигәнен чак кына зуррак итеп алабыз. Бу пирог өч катлы була.

👍Зуррак камырны таба читеннән чыгып калырлык итеп җәеп, төбе аз гына майлы табага салабыз. Аның өстенә 1 аш кашыгы эчлекне ягабыз. Эчлекне кырыйга ук китермәскә кирәк.
👍Икенче кисәк камырны җәеп, эчлек өстенә салабыз. Күпермәсен өчен, берничә урыннан чәнечке белән тишкәлибез. Аның өстенә дә эчлекне ягабыз.
👍Тагын бер кисәк камырны җәеп, шулай ук табага салабыз, өстенә эчлек сылыйбыз.

👍Дүртенче кисәк камырны җәеп, пирогны каплыйбыз. Иң астагы камыр белән читләрен бөреп тоташтырабыз. Өсте күпермәсен өчен чәнечке белән тишкәләп бизибез, уртасына кечкенә генә тишек ясыйбыз.
👍Пирогның өстен тастымал белән каплап, тагын 20 минут күпертеп алабыз.
👍Ә ул арада өстенә сибәргә валчык ясыйбыз: 30 г майны 2 аш кашыгы шикәр комы, 2 аш кашыгы он белән уабыз.

👍Пирог өстенә валчыкны сибеп, 45 минутка 180 градуслы мичкә куябыз.
Суынгач чәй эчәргә бик тәмле, күңелне күтәрә торган пирог була.

Лилия Гәрәева блогыннан.
Фото нейрочелтәр ярдәмендә әзерләнде