Май коңгызыннан ничек арынырга?

Май коңгызы личинкасы — эре (6 см га кадәр), саргылт-ак төстә, С хәрефе сыман бөгелгән гәүдәле һәм зур авызлы, коңгырт башлы була. Аның алгы өлешендә өч пар аягы бар. Үсемлекләрнең тамырларына, бигрәк тә бәрәңге, чөгендер һәм җир җиләгенә зур зыян китереп, 3-4 ел үсә.

Бу корткыч белән яздан көзгә кадәр көрәшү таләп ителә һәм туфракны да даими эшкәртү сорала. 
Бу корткыч личинкаларыннан котылу өчен яз һәм көз җирне кимендә 1 штык тирәнлегендә казырга кирәк. Җәен туфракны йомшартып торып, личинкаларны җыярга була. 
Халык ысулларына килгәндә, личинкаларга каршы көрәштә суган төнәтмәсе ярдәм итә ала. Моның өчен суган кабыгына (1/3 чиләк) кайнар су салып, тәүлек буе әчетергә. Аннан су белән 1:1 кушып, туфракка сибәләр. 
Икенче ысул – горчица төнәтмәсе. 200 г горчица порошогына кайнар су салыгыз, 2 көн әчетегез. Аннан күләмен 20 л га җиткерегез һәм файдаланыгыз.

Нашатырь спирты эремәсе дә личинкаларга каршы көрәшергә булыша. 20 мл нашатырьны 10 л суга бутап, түтәлләргә сибегез. Әлеге ысулларны һәм 7-10 көн саен кабатларга киңәш ителә. Сүз уңаеннан, туфракта азот күп булу май коңгызы личинкаларын куркыта икән. Шуңа да азот күләмен арттыру да бу корткычларны юк итәргә ярдәм итәчәк. 

ФОТО: https://www.freepik.com/