Дмитрий Дьяков: «Яңа ел табынына кош ите пешерергә киңәш итмим»

Дмитрий Дьяков, Татарстан Республикасының кулинарлар берләшмәсе президенты:
- Киләсе ел Әтәч елы булганга, Яңа ел табынына кош ите (каз, тавык, үрдәк) пешерергә киңәш итмим. Әлбәттә, бу минем киңәшем генә. Һәркемнең табынында нәрсә ярата, шул тора инде. Мин һәрвакыт кешеләргә табынга күбрәк яшелчә һәм балык куярга киңәш итәм. Бу файдалы да, җиңел дә булган ризыклар. Балык Омега 3 һәм аксымга бай. Иртән дә сез үзегезне яхшырак хис итәчәксез, ашказанында авырлык булмаячак. Бәйрәм табынында әкәм-төкәмнәр, диңгез кысласы үзенчәлек­ле булачак. Әкәм-төкәмне тере килеш мичтә пешерергә киңәш итәм. Аның өстенә сыр куярга була, кырыена торна җиләге (спаржа) салыгыз. Тәмле дә, файдалы да ризык булачак. Майонезлы салатлар ул безнең традиция инде, аннан берничек тә баш тартып булмый. Мин үзем майонез кулланмыйм. Салатларга лимон, әфлисун, алма согы, зәйтүн мае кушам. Инде майонезсыз берничек тә булмый дисә­гез, аны өй шартларында да ясап була бит. Моның өчен күкәй сарысын каты итеп тугларга кирәк, шуңа аз-азлап ачы аштәмләткеч (горчица) салабыз. Ул куе, үзенчәлекле, шулай ук файдалы соус булачак. Аны ясар өчен ун минут вакыт китә. Яшел җиләк-җимеш ашарга тырышыгыз. Иң мөһиме - күп ашамаска, сәламәтлекне сакларга кирәк. Ашаганың нәрсә - син шул, дип әйтә бездә аш-су осталары.