Грейпфрут тынычландыра

Әлеге җимешнең 85-90 проценты судан тора. Аңарда А, В, D һәм Р витаминнары, шикәр, пектиннар, органик кислоталар, минераль тозлар, эфир мае һәм ачы тәм бирә торган гликозид нарингин бар. Диетологлар грейпфрутны диетик продуктка кертеп карый һәм ябыгырга теләүчеләргә актив рәвештә шуны тәкъдим итә. Моңардан кала, әлеге җимеш бактерияләргә, гөмбәчекләргә каршы көрәшү, температураны төшерү үзлегенә дә ия. Ул шулай ук кан басымын да төшерә, ашкайнатуны яхшырта, иммунитетны ныгыта, эчәсе килүне баса, нервларны тынычландыра. Табиблар грейпфрутны миокард инфаркты кичергән, шикәр авыруыннан җәфаланган кешеләргә һәм авитаминоз вакытында ашарга куша. Грейпфрут йокысызлыктан да дәвалый. Йоклар алдыннан бер кисәк ашап куйсагыз, тыныч йокларсыз.