Көз көне иммунитетны ничек ныгытырга? (Табиб КИҢӘШЛӘРЕ)

Көз көне иммунитетны ныгыту буенча терапевт, кардиолог Альбина Шаһидуллина түбәндәгеләрне киңәш итә:

1. Дөрес туклану. Бу киңәшне хәзер еш бирәләр, дөрес туклану чынлап та күп нәрсәгә тәэсир итә. Көз көне күбрәк аксым кулланырга кирәк. Пешкән ит күбрәк ашагыз. Шулай ук яшелчә, җиләк-җимешләрне дә онытырга ярамый.

2. Көн режимы. Кеше туйганчы йокласа, эш белән ялны аралаштырса иммунитеты гына түгел, нерв системасы да ныгыячак.

3. Саф һавада булу. Көн саен һава торышының нинди булуына карамастан, кимендә ярты сәгать саф һавада булырга тырышыгыз. Яңгырда акыллы кеше этен дә чыгармый дисәләр дә, саф һава файдалы, туңмас, юешләнмәс өчен җылы киенеп чыгарга гына кирәк.

4. С витаминын куллану. Бу могҗизалы витамин иммун системасын ныгыту өчен иң файдалысы булып санала. Ул алмада, яшел тәмләткечләрдә, цитруслы җиләк-җимештә бар. С витамины ылыстан ясалган эчемлекләрдә бик күп.  

5. Фитотерапия. Иммунитетны ныгыту өчен халык медицинасы да ярдәм итә. Миләш, эхинацея, гөлҗимеш төнәтмәләре файдалы. Әлеге җимешләрне 1:10 исәбеннән су белән кушасың да, 15 минут кайнатасың, аннары 40 минутка төнәтергә калдырасың. Төнәтмәне көн саен бер стакан эчәргә киңәш ителә.

6. Начар гадәтләрдән арыну. Тәмәке тарту, спиртлы эчемлекләрне чамасыз куллану, баллы ашарга ярату – болар барысы да иммунитетны какшата.

Фото: proinfekcii.ru