Орхидея үстерү серләре

Чүлмәкнең аскы өлешендә тишекләр булырга тиеш. Артык су агып чыксын һәм тамырлар арасында һава әйләнеше булсын өчен шулай эшләнелә.

Орхидеяны туфракка түгел, ә субстратларга утырталар. Ул агач кайрысы нигезендә ясала һәм составында нарат, чыршы, имән кисәкләре булырга тиеш. Кисәкләрнең зурлыгы 1-5 см чамасы булса кулай. Субстратка тагын агач күмере, керамзит та кушалар.

Орхидея чәчәкләре белән даими сөендерсен өчен аның өчен максималь рәвештә тропик шартлар тудырырга кирәк. Гөл тәүлекнең 12-14 сәгатен яктылыкта уздырырга тиеш. Әмма иртән һәм кичен кояш нурлары турыдан-туры төшмәве яхшырак. Кыш айларында фитолампа кулланырга була.

Температура режимын һәм дымлылыкны саклау хакында да онытмагыз. Җылы ярата торган орхидеялар өчен һава 22..28°С булса әйбәт санала. Ә тауларда үсә торганнарына җәен 15..25°С, кышкы айларда 14..20°С кирәк.

Дымлылыкка килсәк, орхидея үсә торган тирәлектә ул кимендә 50-70 процент булырга тиеш. (Җәйге эсселәрдә моның өчен суны гөлнең яфракларына сиптерергә мөмкин).

💐Орхидея су ярата торган үсемлек. Иң уңайлысы аны сулы савытка батырып тору. Җәй моның өчен 20 минут кирәк булса, кыш 5 минут та җитә. Шул вакыт эчендә тамырлар үзләренә кирәкле суны алырга өлгерә. Әмма артык су сибү дә гөлнең үлүенә китерергә мөмкин. Артык дымлылыкка караганда, орхидея корылыкны җиңелрәк кичерә.

💮Гөлгә су кирәклеген берничә билге буенча ачыклый аласыз:
- чүлмәкнең авырлыгы буенча (бигрәк тә чүлмәк үтә күренмәле булмаса);
- кулыгызны гөл утыртылган катнашмага 5 сантиметрга батырып карап;
- орхидея бәйләп куелган таякның аскы очына карагыз.

Әлбәттә инде тамырларның визуаль халәте дә су кирәкме-юкмы икәнен күрсәтәчәк. Әгәр дә тамырлар яшел икән, димәк, дым җитәрлек. Әгәр сорырак булса – су сибәргә вакыт җиткән дигән сүз.

Фото: https://unsplash.com/s/photos/orchid-flower