Язга көздән әзерләнәбез: помидорның кайсы сортлары иртә өлгерә?

Иртә өлгерә торган помидор сортларын әйтсәгез иде. Карбызны кавынга ялгап утырту мөмкинме икән, шул хакта да язсагыз иде.

Азат Мансуров, Самара өлкәсе, Клявлин районы.

Сорауга бакчачы Фарсель Зыятдинов җавап бирә:

- Иртә өлгерә торган помидорлардан ачык грунт өчен Джина сорты яхшы. Ул зур булып үсә, уңышы мул була. Бер помидор 250-350 граммга җитә. Үзем Балконное чудо сортын яратып үстерәм. Гигант лимонный дигән төр дә тәмле була. Теплица өчен иртә өлгерешле сортлар бик күп. Аеруча Базар короле, Миллениум, Розмарин сортларын утыртырга киңәш итәм.

Карбызга кабак ялгауга килгәндә, Татарстанда мондый тәҗрибә бар. Хәтта помидорны бәрәңгегә ялгаучылар да очрый. Әмма бу бик катлаулы процесс, һәрчак килеп чыкмаска да мөмкин. Карбызны кабакка үсентеләр кечерәк вакытта, чәчәк бөреләрен ялгап утыртырга кирәк.